एक जोडी लौरो समात्न १० हजार नग्न पुरुषहरुको होडबाजी

पातलो लगौंटी मात्र लगाएका १० हजार पुरुषहरुले गत सप्ताहान्तमा एउटा जापानी मन्दिर परिसरमा एक जोडी लौरोका निम्ति तछाडमछाड गरे । उनीहरु हाडाका मात्सुरी अर्थात् नग्न पुरुष महोत्सवमा भाग लिइरहेका थिए ।

पश्चिम जापानमा रहेको ओकायामा शहरस्थित सैदाइजी कान्नोन इन मन्दिरमा प्रत्येक वर्ष यो महोत्सव आयोजना हुन्छ । शनिबार राति आयोजना भएको महोत्सवका क्रममा एक पुजारीले भिडतर्फ फालेको एक जोडी ‘भाग्यमानी लौरो’ हात पार्नका निम्ति एक घन्टासम्म नग्न पुरुषहरुको होडवाजी चलेको हो ।

मन्दिरमा जानुअघि यी पुरुषहरुले ठण्डी मौसममा चिसो पानीको फोहोरामा स्नान गरी आफूलाई चोख्याएका थिए । रातको १० बजे मन्दिरको बत्ती निभाइयो र चार मिटर अग्लो झ्यालबाट दुई सिंगीलाई भिडतर्फ फालियो ।

स्थानीय भाषामा सिंगी भनिने ४ सेन्टिमिटर मोटाई र २० सेन्टिमिटर लम्बाई भएका पवित्र लौरो समात्न सक्ने व्यक्तिको एक वर्षसम्म भाग्य चम्किने विश्वास गरिन्छ । लौरो समात्न सफल हुने व्यक्ति फुकु ओटोको अर्थात् भाग्यमानी पुरुष कहलाउँछन् ।

भाग्यमानी पुरुषले लौरोलाई मासु भनिने काठको बाकसभित्र हालेर राख्छ, जसबाट १२ महिनासम्म उक्त व्यक्तिको जीवनमा सौभाग्य वर्षिने विश्वास गरिन्छ ।

यो परम्परा पाँच सय वर्ष पुरानो हो । त्यतिबेला भक्तजनहरु पुजारीले फ्याँकेको कागजको जन्तर हडप्नका लागि प्रतिस्पर्धा गर्थे । कागत च्यातिने समस्याका कारण पछि गएर लौरो फाल्न थालिएको हो । हरेक वर्ष बढ्दो संख्यामा पुरुषहरु यो महोत्सवमा सहभागी भइरहेका छन् ।