२४ असोज, सप्तरी । राजविराजमा एक व्यापारीको दिनदहाडै ९ लाख ५० हजार रुपैयाँ लुटिएको छ ।
एउटा बैंकबाट अर्काे बैंकमा जम्मा गर्न गइरहेको अवस्थामा उनको रकम लुटिएको हो ।
राजविराज-९ मलेठ निवासी इजलास मियाँले मंगलबार दिउँसो राजविराजस्थित बाणिज्य बैंकबाट झिकेको उक्त रकम तत्कालै लुटिएको हो ।
बाणिज्य बैंकदेखि ३० मिटरको दूरीमा रहेको सनराइज बैंकमा रकम जम्मा गर्न जाँदै गर्दा अपरिचित व्यक्तिको समूहले इजलासको शरीरमा फोहोर फ्याँकी रकम लिएर फरार भएको पीडितले जनाएका छन् ।
सनराइज बैंकमा रकम जम्मा गर्नका लागि स्टाम्प बनाउन जाने क्रममा माइक्रो स्टेन्ड नजिकैबाट उनको रकम लुटिएको प्रहरीले जनाएको छ । ‘एक्कासी एक जना अज्ञात व्यक्ति आएर घाँटीमा फोहोर दली रकमले भरिएको ब्याग लिएर भागे’ उनले भने, “ती व्यक्ति को हुन् र कहाँ भागे केही थाहा छैन् ।”
राष्ट्रिय बाणिज्य बैकमा हलिमा खातुनको नाममा रहेको १९०२५ नम्बरको खाताबाट उनले रकम झिेकेका थिए ।
उनले सोही रकमले आउँदो दीपावलीका दिनदेखि मलेठमा हार्डवेयर पसल सन्चालन गर्ने योजना बनाएका थिए ।
यसैबिच रकम लुटेको आशंकामा एक जना युवकलाई पक्राउ गरिएको प्रहरीले जनाएको छ ।
प्रतिक्रिया 4