सिद्धबाबा सडक खण्डमा पहिरो : जीप पुरिँदा १ जनाको मृत्यु, ४ घाइते

२७ भदौ, काठमाडौं । सिद्धबाबा सडक खण्डमा पहिरोले २ गाडी पुरिँदा १ जनाको मृत्यु भएको छ भने अन्य ४ जना घाइते भएका छन् ।

पाल्पाको तिनाउ गाउँपालिकाकाे दोभान हेडबक्स नजिकै शुक्रबार बिहान १०ः३० बजे खसेको सुख्खा पहिरोले लु १ ज २६१७ नम्बरको जीप पुरिँदा गुल्मी छापचौरका जीप चालक कमल परियारको मृत्यु भएको हो ।

जिल्ला प्रहरी कार्यालय, पाल्पामा कार्यरत एसपी दीपेन्द्र जीसीले परियारकाे  घटनास्थलमै मृत्यु भएको जानकारी दिए ।  एसपी  जीसीका अनुसार सडकमाथिबाट खसेको ढुंगाले लागेर सोही जीपमा सवार ४ जना घाइते भएका छन् ।

उनीहरूको अवस्था मध्यम रहेको बताइएको छ । घाइते चारै जनालाई उद्धार गरेर प्रहरीले लुम्बिनी अञ्चल अस्पताल बुटवल पठाएको छ ।

त्यस्तै, लु २ च ५९३८ नम्बरको स्कार्पियो गाडी पनि सुख्या पहिरोमा परेको थियो । यद्यपि, स्कार्पियोमा सवार व्यक्तिहरू भने सकुसल रहेकाे प्रहरीले जनाएकाे छ ।

सुख्या पहिरो खसेपछि सिद्धबाबा राजमार्गको सडकखण्डकाे आवागमन प्रभावित हुन पुगेको थियो । पहिरो खसेको १ घण्टापछि सडकको अवरोध हटाएर सवारी एकतर्फी सञ्चालनमा ल्याइएको एसपी जीसीले अनलाइनखबरलाई जानकारी दिए ।

‘सुख्खा पहिरोपछि अवरुद्ध भएको सडक एकतर्फी खुलाएर सवारी आवागमन सञ्चालनमा ल्याएका छौं’, जीसीले भने, ‘बाँकी अवरोध हटाएर दुर्ईतर्फी सञ्चालनमा ल्याउने प्रयास गरिरहेका छौं ।’