३ मंसिर, उदयपुर । उदयपुरको बेलका नगरपालिकामा प्रहरी र स्थानीयवासीबीच झडप भएको छ ।
नदी उत्खननको विषयलाई लिएर अवरोधमा उत्रिएका स्थानीयको माग सम्बोधन नगरी टिपरलाई सदरमुकामतर्फ लान खोजिएपछि झडप भएको स्थानीयले जनाएका छन् ।
सिसुवा खोलाबाट अवैध रुपमा ढुंगा, गिटी निकालिएको भन्दै स्थानीयले लोड गरिएको २० वटा टिपरलाई केही दिनदेखि रोकिराखेका थिए ।
मंगलबार बिहान प्रहरीले सुरक्षाका कारण देखाउँदै सदरमुकामतर्फ टिपर लान खोजेको थियो ।
तर, स्थानीयले टिपर लगिएको सूचना पाएलगत्तै अवरोध जनाएका थिए । त्यसक्रममा भएको झडपमा तीन जना प्रहरी पनि घाइते भएका छन् ।
जिल्ला प्रहरी कार्यालय, उदपुरको सञ्चार शाखाले जनाएअनुसार नगरपालिकाले पर्याप्त छलफलविनै लालबजारको खोलाबाट गिटी बालुवा निकाल्न टेण्डर खुलाएको स्थानीयवासीको भनाइ छ ।
स्थितिलाई नियन्त्रणमा लिन प्रहरीले अश्रुग्याँस पनि प्रहार गरेको छ । अहिले स्थानीयले यातायात सेवा ठप्प पारेका छन् ।