विद्यालयमा पढाउनका लागि शिक्षिकाहरुले अब शैक्षिक योग्यता, शिक्षण कला, क्षमता तथा सीप भएर मात्र पुग्ने छैन । अब शिक्षिकाहरु भर्जिन अर्थात् कुमारी समेत हुनुपर्नेछ ।
सुन्दैमा कस्तो वाहियात लाग्ने कुरा । तर यो साँचो हो । यद्यपि हाम्रो देशमा भने होइन । दक्षिण अमेरिकी मूलुक ब्राजिलमा विद्यालयमा पढाउन चाहने महिलाहरुले आफ्नो कुमारी रहेको प्रमाण पेश गर्नु पर्नेछ ।
समाचार अनुसार ब्राजिलको साओ पाओलोमा शैक्षिक संस्थाहरुमा जागिर खान चाहने महिला उमेद्वारहरुलाई उनीहरुको कुमारित्व परीक्षण गर्न बाध्य पार्ने गरिएको छ ।
शिक्षण संस्थाहरुले कुनै पदमा छनोट हुनका लागि महिला उमेद्वारले आफुलाई क्यान्सर नभएको तथा यौनिक रुपमा सक्रिय नभएको चिकित्सकीय परीक्षण रिपोर्ट अनिवार्य रुपमा पेश गर्नुपर्ने नियम बनाएका छन् ।
यद्यपि अधिकारवादी समूहहरुले भने यस्तो नियम महिलाहरुको गोपनियता तथा मानवीय आत्मसम्मान माथिको समग्र हिंसा भनि टिप्पणी गरेका छन् ।
उसो त साओ पाओलोको शिक्षा विभागले नै सरकारी शिक्षण संस्थामा जागिर खानका लागि उमेद्वारको यौनरोग परीक्षण अनिवार्य गरेको छ । तथापि यस्तो प्रकारको कुमारित्व परीक्षण गरिने व्यवस्था भने सरकारी नियममा छैन ।
स्मरण रहोस् ब्राजिलमा यस्ता खालका घटना बारम्बार आउने गर्छन् । गएको वर्ष उत्तर पूर्वी ब्राजिलको बाहिया प्रान्तमा प्रहरीमा भर्तिका बेला महिलालाई उनीहरुको कन्या जाली नच्यातिएको प्रमाण पेश गर्न लगाइएपछि त्यसले ठूलै तहल्का मच्चाएको थियो । पछि सरकारले त्यस्ता परीक्षणको अनिवार्यता हटाइएको घोषणा गरेको थियो ।
पढाउने पेशामा आबद्ध हुने महिलाहरु बढि छिप्पिएको उमेरका नहोउन् र उनीहरु स्वस्थ होउन् भन्नका लागि यस्तो परीक्षणको व्यवस्था गरिएको दाबी शैक्षिक संस्थाहरुको छ । एजेन्सी