यो बर्ष प्रदर्शनमा आएको अधिकांश नेपाली चलचित्रको व्यापार कमजोर छ । चलचित्रको व्यापार कमजोर बनेपनि निर्माण भने रोकिएको छैन । यही सेरोफेरोमा केही नेपाली चलचित्रले भने आफ्नो लगानी सुरक्षित पनि गरेका छन् । अहिलेसम्म ‘नोभेम्बर रेन, कबड्डी, कोहिनुर, हिम्मतवाली, लज्जा, जेरी’ले यो बर्ष आफ्नो लगानी सुरक्षित गरेका छन् ।
बर्षमा बनेका १ सय बढी चलचित्रमा यो व्यापार सुखद भने होइन । तर, राम्रो प्रचार गरिएका र दर्शकको दिमागमा बसेका चलचित्रले व्यापार भने राम्रो गरेका छन् । जसका कारण पनि चलचित्रलाई ब्रान्ड बनाउन सक्नुपर्छ भन्ने सन्देश यी चलचित्रको व्यापारले देखाएको छ ।
फागुन २२ गतेबाट प्रदर्शनमा आएको चलचित्र ‘पूनर्जन्म’ले पनि आफ्नो व्यापार सुरक्षित गरेको यसको निर्माणपक्षले दाबी गरेको छ । ३ हप्तासम्म सुखद रुपमा चलेको यो चलचित्रले १ करोड माथिको ग्रस कलेक्शन गरेको निर्माणपक्षले दाबी गरेको छ ।
निर्देशक सजन श्रेष्ठले अनलाइनखबरलाई दिएको व्यापारिक रिपोर्टमा चलचित्रले करिब ४७ लाखको शेयर प्राप्त गरेको छ । करिब ३७ लाखको हारहारीमा बनेको भनिएको यो चलचित्रले आफ्नो लगानी उठाएको निर्देशकले बताए ।
चलचित्रको व्यापार चैत्र १२ गतेसम्म पनि गतिलो देखिएको थियो । जसका कारण पनि यो बर्ष प्रदर्शनमा आएका चलचित्र मध्ये ‘पूनर्जन्म’ लगानी सुरक्षित गर्ने चलचित्रको रुपमा देखिएको छ ।
यस्तै, शुक्रबार अर्थात चैत्र १३ गतेबाट प्रदर्शनमा आएको चलचित्र ‘भुल भूलैया’को व्यापार आक्रामक देखिएको छ । शुक्रबार र शनिबार यो चलचित्रले सिंगल थिएटरमा आक्रामक व्यापार गरेको वितरक एफडी कम्पनी र गोपाल कायस्थले बताएका छन् । निर्देशक योगेश घिमिरेले शुक्रबार र शनिबार काठमाण्डौका मल्टिप्लेक्समा पनि चलचित्रले सुखद व्यापार गरेको बताए ।
शनिबार काठमाण्डौका अष्टनारायण, गोपिकृष्ण लगायतका हलमा दर्शकको उपस्थिती आक्रामक देखिएको छ । काठमाण्डौ बाहिरका हलमा पनि चलचित्रको व्यापार निक्कै राम्रो देखिएको वितरक एफडी कम्पनीले जनाएको छ ।
यस्तै, चलचित्र ‘भुल भूलैया’सागै प्रदर्शनमा आएको चलचित्र ‘षडङ्ग’को मल्टिप्लेक्समा शुक्रबार र शनिबार व्यापार राम्रो भएको वितरक कम्पनी पपकर्नले बताएको छ । यो नेपाली चलचित्रका लागि एउटा सुखद पक्ष हो ।