बसन्त रानाभाट ,बार्सिलोना
वैबाहिक जीवनमा जोडिएको १३ बर्ष पुगिसक्दा पनि मोडलिङलाई आफ्नो करिअर बनाएकी योगिता थापा सपनाको धेरै नजिक पुगेकी छिन् । ‘टप मोडल बेल्जियम सिनियर २०१६’को संकरणका लागि हाल सेमिफाइनलमा उनी प्रतिस्पर्धा गरिरहेकी छिन् ।
२ छोराकी आमा योगिता परिवारको हौसलाका कारण आफू निरन्तर यो क्षेत्रमा लागेको बताउँछिन् । उनले गायक ओम विक्रम बिष्टको ‘आवाज देउ’, दिव्य ज्योतीको ‘नजर’ बोलको गीतमा मोडलिङ गरिसकेकी छिन् । सन् २००४ देखि चल्दै आएको एक चर्चित प्रतियोगीता हो ‘टप मोडल बेल्जियम’ ।
यसमा जुनियर र सिनियर गरि २ प्रकारका प्रतिस्पर्धा हुन्छन् । जुनियरतर्फ महिला र पुरुष दुवैलाई सहभागी गराइएपनि सिनियरतर्फ भने महिलाले मात्र प्रतिस्पर्धा गर्दै आएका छन् । यसको अन्तिम प्रतिस्पर्धा सन् २०१६ मा बेल्जियममा हुनेछ ।
नेपाली चेली योगिताले सपना पुरा गर्नका लागि युरोपमा बस्ने नेपालीसँग भोटको अपिल गरेकी छिन् । प्रतियोगीहरुलाई भोट गर्नका लागि बेल्जियम, लुक्सम्बर्ग र फ्रान्सबाट एसएमएस भोटिङ गर्न सकिनेछ ।
नेपाली चेली थापालाई बेल्जियमबाट भोट गर्नको निम्ति TMBC507 लेखि 3565 मा , फ्रान्सबाट TMBC507 लेखि 81013 मा र लक्जम्बर्गबाट TMBC507 लेखि 64747 मा आफ्नो मोबाईलबाट एसएमएस भोट गर्न सकिन्छ।
सेमिफाइनलमा प्रतिस्पर्धा गरिरहेकाहरुलाई जुन ५ सम्म भोट गर्न सकिने आयोजकले बताएको छ । नेपाली चेली योगिताले अनलाइनखबरसँग कुरा गर्दै भनिन्-‘यो मैले देखेको सपना हो । यसमा नेपाली समुदायको हात सबैभन्दा ठूलो छ । उपाधी जित्न सके भने मेरो पुरस्कार नेपालका भूकम्प पीडितका लागि सहयोग गर्न चाहन्छु ।’