१० भदौ, काठमाडौं । केवल २२ वर्षको उमेरमा गुजरात सरकारको टाउको दुःखाइ बनेका हार्दिक पटेललाई दुई महिना अघिसम्म निकै कम मानिसले मात्र जान्थे ।
तर, उनी अहिले भारतका प्रधानमन्त्री नरेन्द्र मोदीको गृहनगर गुजरातमा हिजोबाट हिरो बनेका छन् ।
गुजरातको जनसंख्यामा २० प्रतिशत हिस्सा पटेल समुदायको छ । पटेल समुदायले आरक्षण र ओबीसी दर्जा माग गर्दै पछिल्लो केही वर्षदेखि आन्दोलन गर्दै आएको छ ।
त्यही आन्दोलनको कमाण्ड अहिले नयाँ पुस्ताका हार्दिक पटेलले सम्हालेका छन् । रोजगारी र शिक्षामा आरक्षणको माग गर्दै उनको अगुवाइमा पछिल्लो ४० दिनमा गुजरातमा आन्दोलन र विरोध प्रदर्शन चर्किएको छ ।
पटेल समुदायमाथि भएको भनिएको अन्यायबारे प्रखर वक्ता हार्दिक पटेललाई साथ दिन हजारौं मानिस सडकमा आएका छन् । दुई दिन अघि अहमदाबादको जीएसमडीसी मैदानमा झण्डै ३ लाख मानिस जम्मा भएका थिए ।
हार्दिक पटेल गुजरातको भाजपा कार्यकर्ता भारतभाई पटेलका छोरा हुन् । उनको पानी तान्ने पम्प बेच्ने सानोतिनो व्यापार छ ।
हार्दिक पटेलले तीन वर्ष अघि अहमदाबादको सहजानंद कलेजबाट स्नातक गरेका थिए ।
हार्दिक पटेलले आफ्नो सार्वजनिक जीवन २०११ मा महिला तथा गरिब किसानविरुद्ध हुने उत्पीडनसँग लड्न एक सामाजिक संगठन खोलेर सुरु गरेका थिए ।
बीबीसी हिन्दीको सहयोगमा
