चन्द्र केसी
हल्यान्ड । नेपाली जनसम्पर्क समिति नेदरल्याण्डले समितिका उपाध्यक्ष विष्णु पोखरेल र निवर्तमान अध्यक्ष तथा बर्तमान सल्लाहकार ठाकुर शर्मा मनोहरीलाई साधारण सदस्य समेत नरहने गरी सवै जिम्मेवारी मुक्त गरेको छ । नेपाली जनसम्पर्क समिति नेदरल्याण्डका अध्यक्ष दिपक रेग्मीद्वारा जारी गरिएको विज्ञप्तिमा संगठनमा अनुशासन तथा नियमलाई अक्षुण राख्नको लागि अप्रिय निर्णय गरिएको जनाएको छ ।
१ सेप्टेम्बरमा भइरहेको एनआरएन नेदरल्याण्डको चुनावमा जनसंपर्क समिति नेदरल्याण्डस्ले कृष्ण राज अधिकारीले नेतृत्व गरेको समुहलाई समर्थन गर्ने आधिकारीक निर्णय गरेको तर पोख्रेल र शर्मा समितिको निर्णयको बर्खिलापमा गएको, संगठनले पटक पटक संगठनमा फर्किन गरेको अनुरोधलाई वेवास्ता गरेको कारण जनसंपर्क समितिको अनुशासन समितिले साधारण सदस्यबाट निलम्बन गर्न गरेको सिफारिसलाई समितिले अनुमोदन गरेको छ ।
निवर्तमान अध्यक्ष ठाकुर शर्मा मनोहरी गैर आवासीय नेपाली संघ नेदरल्याण्डसको अध्यक्ष र उपाध्यक्ष विष्णु पोख्रेल सदस्यमा जनसंपर्क समितिले समर्थन गरेको समुहको विपक्षमा चुनावमा ओर्लिएका छन् ।
