म्युजिक भिडियो विवादमा ‘दारी बा’ले माफी मागे

Quick Summary

AI-generated by OK AI. Editorially reviewed.

कलाकार सुरविर पण्डितले आफ्नो पछिल्लो म्युजिक भिडियोको आलोचनापछि माफी मागेका छन्।
भिडियो इसाई धर्म प्रचारको उद्देश्यले बनाइएको भन्दै आलोचना भएको थियो।
सुरविरले आफू र अर्का कलाकार रामचन्द्र अधिकारीले दर्शकसँग माफी मागेका छन्।
उनीहरुले आफ्नो कार्यले कसैको मन दुखाउनुको उद्देश्य नभएको बताएका छन्।
आगामी दिनमा धर्म, संस्कार, संस्कृति र राष्ट्रप्रति गर्व गर्ने काम गर्ने प्रतिबद्धता व्यक्त गरेका छन्।

काठमाडौँ । कलाकार सुरविर पण्डित ‘दारी बा’ले आफू अभिनित पछिल्लो म्युजिक भिडियोलाई लिएर आलोचित भएपछि दर्शकसामु माफी मागेका छन् । ‘मेरी बास्सै’को टिकटक एकाउन्टमार्फत उनले भिडियो सन्देश जारी गर्दै माफी मागेका हुन् ।

उनले अभिनय गरेको इसाई धर्मसँग सम्बन्धित एक भिडियो हालै रिलिज भएको थियो । इसाई धर्म प्रचार गर्ने उद्देश्यले बनाइएको भिडियोमा अभिनय गरेको भन्दै सुरविर र अर्का कलाकार रामचन्द्र अधिकारी ‘काजी बा’को आलोचना भैरहेको छ ।

सुरविरले भिडियोमा रामचन्द्रको तर्फबाट पनि दर्शकसँग माफी मागेका छन् । सुरविरले उक्त घटनाप्रति दुःख व्यक्त गर्दै क्षमायाचना गरेका हुन् । उनले केही दिनअघि दुई इसाई धर्मबारेको गीतमा अभिनय गरेको स्वीकारेका छन् ।

कलाकार भएपछि जे कुरा आएपनि अभिनय गर्नुपर्छ भन्ने कुरा अग्रजबाट सिकेको भन्दै उनले अभिनय गरेको बताएका छन् । ‘हाम्रो उद्देश्य कसैको मन दुखाउनु पटक्कै थिएन, सिर्फ कलाकारिता गर्ने मात्रै थियो । म एकदमै हृदयदेखि क्षमा चाहन्छु’ उनले भने । आउँदा दिनमा धर्म, संस्कार, संस्कृति र राष्ट्रले गर्व गर्ने किसिमका काम गर्ने उनको प्रतिबद्धता छ ।