१९ असार, काठमाडौं । एमालेका अध्यक्ष झलनाथ खनालले नवौं महाधिवेशनबाट पार्टी बैचारिक र सांगठानिक दुवै क्षेत्रमा अझ बढी एकतावद्ध हुने दाबी गरेका छन् । उदघाटन समारोहलाई सम्बोधन गर्दै अध्यक्ष खनालले नवौं महाधिवेशन एकताको महाधिवेशन हुने बताए ।
‘हामी यो महाधिवेशनबाट एमालेलाई एकताबद्ध र एकढिक्का बनाउछौं’ खनालले भने ‘बैचारिक एकता कायम भइसकेको छ, अब नेतृत्वमा सर्वसम्मति गरेर सांगठानिक एकता पनि कायम हुन्छ’ । खनालले सर्वसम्मतिबाट आफू अध्यक्ष हुन खोजेका छन् । तर, यसबारे उनले मन्तव्यमा केही पनि खुलाएनन् ।
खनालले महाधिवेशन बिना बिघ्नबाधा सम्पन्न हुने भन्दै व्यवस्थापकीय कामहरु पनि सम्पन्न भइसकेको बताए । उनले एमाले जति लोकतान्त्रिक पार्टी नेपालमा अरु नभएको दाबी गरे । मञ्चमै रहेका कांग्रेस कार्यवाहक सभापति रामचन्द्र पौडेललाई सम्बोधन गर्दै उनले भने ‘यो कुराले रामचन्द्रजीलाई पनि दुख्ने छैन, एमाले जति लोकतान्त्रिक दल अरु छैन ।’
