३१ असार, काठमाडौं । नेकपा एमालेको नेतृत्व चयनका लागि भएको निर्वाचनको मतगणना अब पश्चिम नेपालतिर पुगेको छ । पूर्वको मत गन्दा माधव नेपाल पक्ष अगाडि देखिए पनि पश्चिमको मत गणनामा ओलीपक्ष हावी हुने भन्दै दुबै समूह चुनाव जित्ने आशामा छन् ।
सोमवार मध्यरातसम्म मेचीदेखि नारायणीसम्मका सबै जिल्ला र भातृ संगठन तथा केन्द्रीय निकायको मतगणना सकिँदा एक पदाधिकारी र केही केन्द्रीय सदस्यमा बाहेक सबै पदमा नेपाल पक्षले कम्तिमा ४० देखि बढीमा २ सय मतसम्मले अग्रता लिएको छ । मंगलबार बिहान दश बजेबाट चार नम्बर बुथको गणना शुरु भएको छ ।
केन्द्रीय सदस्य तथा आयोगहरुको मतगणना पनि पदाधिकारीसँगै सक्ने गरी रातभरि गणना भएकाले पदाधिकारीको गणना स्थगित भएको थियो । मंगलबार गणना हुने चार र ५ नम्बर बुथबाट दुबै पक्षले आ-आफ्नो अनुकूल हुने अपेक्षा राखेका छन् । त्रिशुली र नारायणी पूर्वको गणनामा अध्यक्षमा माधव नेपालले ४७ मतले मात्रै अग्रता लिएकाले ओली पक्ष अझै पनि उत्साहित नै देखिएको छ । तर, नेपाल पक्षले भने अझै पनि १२/१५ मतले भए पनि जित्न सक्ने आशा कायमै राखेको छ ।
पश्चिमको अनुमान
मंगलबार गणना हुने बुथहरुमध्ये गण्डकी, लुम्बिनी, राप्ती र भेरीमा ओली पक्षले अग्रता लिने अनुमान गरिएको छ भने सेती, महाकाली, कर्णाली र प्रवासमा नेपाल पक्षले अग्रताको अपेक्षा गरेको छ । तर गण्डकी र राप्तीमा ओली पक्षको अग्रता फराकिलो रहेकाले अध्यक्षमा ओलीलाई फाइदा हुन सक्छ । १४ जना पदाधिकारीमा नेपाल पक्षका कम्तिमा ५ जनाले जित्ने सम्भावना देखिएको छ भने गणना सक्दासम्म यो संख्या ७ पुग्न सक्ने अनुमान गरिएको छ ।
माधव नेपाललाई धोका
सोमवार बेलुकासम्म गनिएका मतहरुमध्ये ४४ मतपत्रमा अध्यक्ष पदमा दुबै उम्मेदवारलाई खाली राखिएको गणनामा सहभागी नेपाल पक्षका लेखा आयोगका उम्मेदवार होम बूढाथोकीले जानकारी दिए । उनका अनुसार ३७ मतपत्रमा नेपालका पक्षको पूरै प्यानलमा मत दिएर अध्यक्षमा मात्र खाली राखिएको छ भने ७ मतपत्रमा ओली बाहेक उनको प्यानलका सबैलाई मत दिइएको छ । ‘आफ्नै प्यानलबाट ३७ मत नेपाललाई नआउनुले गम्भीर धोकाको संकेत गरेको छ’ नेपाल निकट एक नेताले भने ।
केही मतपत्रमा दायाँतर्फका नेपाल पक्षका उम्मेदवारहरुलाई भोट नदिई बायाँतर्फका उम्मेदवारले मात्र मत पाएकाले नेपाल पक्षलाई घाटा भएको छ । सोमवार बेलुकासम्मको मतगणनामा अध्यक्षमा नेपालको ६ सय ४१ र ओलीको ५ सय ९३ मत छ । सबैभन्दा बढी मत गोकर्ण विष्टले सचिवमा पाएका छन् ।
बैकल्पिक केन्द्रीय सदस्यहरुमा ओली पक्षका माधव ढुंगेलको सबैभन्दा बढी मत आएको छ भने सोमबार मध्यरातसम्मको गणनामा नेपाल पक्षका केन्द्रीय सदस्यहरु धेरैको अग्रता छ ।