भीम तामाङ
१० भदौ, मलेसिया । मलेसियाको जोरबारुस्थित तिब्राउमा रहेको जेसिवाई कम्पनीमा कार्यरत एक नेपाली कामदारको मृत्यु भएपछि त्यहाँ कार्यरत श्रमिकले कम्पनीमा तोडफोड गरेका छन् ।
कम्पनीमा कामकै क्रममा विरामी भएपछि झापाको चकचेका हर्कबहादुर निरौलाको शुक्रबार मृत्यु भएपछि त्यहाँ कार्यरत अन्य कामदारले निरौलाको उपचारमा कम्पनीले बेवास्ता गरेको भन्दै दुई दिनदेखि काम बन्द गरेका थिए ।
निरौलाको उपचारै नपाई निधन भएको भन्दै हड्तालमा उत्रेका कामदारमाथि कम्पनी मालिकका प्रतिनिधिले आक्रमण गरेपछि कामदारले कम्पनीको गाडीमा आगजनी गर्नुका साथै कम्पनीको ए, बी र सी ब्लकमा तोडफोड समेत गरेका छन् ।
हड्तालमा उत्रेका नेपाली, बंगाली, म्यानमार र भियतनामीसहित करिब ३५ सय कामदार मध्ये २२ जना नेपालीलाई नियन्त्रणमा लिएर जेसिवाईकै बुलाईमा रहेको भवनमा लगेर कम्पनी सञ्चालकले यातना दिएका थिए । आफ्ना साथीहरुमाथि यातना दिएपछि कम्पनीमा रहेका सबै कामदार प्रतिकारमा उत्रेका थिए ।
कम्पनीले उपचारमा लापरबाही गर्दा हर्कबहादुरको मृत्यु भएपछि काम ठप्प पारेका कामदारको माग पूरा गर्न कम्पनी सहमत भएपछि ३ दिनसम्म ठप्प काम सोमबारबाट काम शुरु भएको थियो ।
काम शुरु गरेपछि आन्दोलनको अगुवाई गरेको भन्दै २२ जना नेपालीलाई नियन्त्रणमा कम्पनी मालिकले लिएर यातना दिएपछि कामदारले मंगलबार विहान कम्पनीमा तोडफोड र आगजनी गरेका हुन् ।
कामदारले कम्पनीको भवनमा तोडफोड र ढुंगामुढा गरेपछि कम्पनीको गेटमा करिब डेढ सयजना दंगा प्रहरी परिचालन गरिएको छ । आन्दोलनमा उत्रेका कामदारले बन्दमा काम गरेको भन्दै दुईजना बंगालीलाई कुटपिट गरेका छन् ।
घटनाबारे बुझ्न दूतावासका कर्मचारी कम्पनीमा आउँदैछन् । दंगा प्रहरी परिचालित भएकाले कम्पनीको अवस्था अहिले सामन्य बन्ने क्रममा छ ।
