९ असोज, काठमाडौं । यू-१९ राष्ट्रिय क्रिकेटको उपाधि क्षेत्र नम्बर ६ बैतडीले जितेको छ । बिहीबार भएको फाइनलमा क्षेत्र नम्बर ८ पोखरालाई ९६ रनले हराउँदै बैतडीले उपाधि उचालेको हो ।
कीर्तिपुरमा टस हारेर व्याटिङ थालेको बैतडीले ४९ ओभरमा सबै विकेट गुमाएर १५३ रन बनायो । उसका लागि योगेन्द्र कार्कीले २५ तथा प्रेम तामाङले २३ रन जोडे । अरुण ऐरीले २० रन जोडे ।
पोखराका दिनेश श्रेष्ठ, सुशील कँडेल र विपन कार्कीले समान २-२ विकेट लिए ।
जवाफमा मैदान उत्रिएको पोखरा २३.५ ओभरमा ५७ रन जोड्दा अलआउट भयो । उसका लागि खेमराज पौडेलले २१ रन बनाए भने राजेश लम्सालले १२ रन जोडे । अन्य व्याट्सम्यानले दोहोरो अंक जोड्न सकेनन् ।
पोखरालाई सस्तैमा समेट्ने क्रममा प्रेम तामाङले ३ विकेट लिए भने योगेश्वर कार्की र धिरज जैरुले समान २-२ विकेट लिए । प्रेम तामाङ म्यान अफ दि म्याच बने ।
उपाधिसँगै बैतडीले २५ हजार पाएको छ भने पोखराले १५ हजारमा चित्त बुझाएको छ ।
फेयर प्ले अवार्ड धनगढीले पाएको छ । बैतडीका प्रेम तामाङ प्लेयर अफ दि सिरिज घोषित भए । फाइनलसहित तीन खेलका म्यान अफ दि म्याच उनले १० हजार पाए ।
