१२ असोज, काठमाडौं । काठमाडौंमा बस्दै आएका धेरैलाई दसैं मनाउन घर फर्कने चटारो छ । आइतवारसम्म कम्तिमा १३ लाख मान्छे काठमाडौंबाट बाहिरिएका छन् । दसैंका लागि काठमाडौं छाड्नेहरुको संख्या ३० लाख पुग्ने अनुमान गरिएको छ ।
तर, सार्वजनिक यातायात चढेर दसैंमा घर जान सजिलो छैन । अनलाइनखबरको टोली कलंकी बसपार्क क्षेत्रमा पुग्दा यस्तै देखियो । कहि चारा सयको टिकट ६ सय ५० रुपैयाँ लिइएको छ भने केही मुढामा बसेर भएपनि जान बाध्य छन् । दुई जनालाई एउटै सिटको टिकट दिइएको समेत भेटियो ।
टिकट नकाटेकाहरु कुनै बसमा सिट पाइएला कि लैजाला भन्ने आशमा सडक किनारमा कुरिरहेका भेटिए । उनीहरु बस नपाए ट्रक चढेर जान पनि तयार हुन्छन् ।
३० लाख पुग्ने अनुमान
आइतवारसम्म कम्तिमा १३ लाख मान्छे काठमाडौंबाट बाहिरिएका छन् । यो संख्या स्थलमार्गबाट सार्वजनिक सवारी साधान प्रयोग गर्नेहरुको हो । निजी साधनमा जानेहरुको संख्या पनि उल्लेख्य हुन्छ ।
निजी सवारी साधनमा जाने र हवाई मार्गबाट जानेहरुको समेत संख्या जोड्दा १५ लाख भन्दा बढि मान्छेले राजधानी छाडिसकेको यातायात व्यवसायी महासंघले जनाएको छ । दशैं मनाउन आ-आफ्नो जन्मथलो जानेहरुको संख्या यस वर्ष ३० लाख नाघ्ने अनुमान यातायात व्यवस्था विभागका अधिकारीहरुले गरेका छन् ।
सरकारी कर्मचारी तथा अन्य जागिरेहरुले अझै राजधानी छाडेका छैनन् । असोज १४ र १५ गते सबैभन्दा बढि चाप हुने यातायात व्यवसायीले बताएका छन् ।
असोज १४ गतेपछि प्रायः सबै कार्यालयहरु बिदा हुने भएकाले त्यसपछि यात्रुको चाप बढ्नेछ ।
