सुरेश भुसाल
क्वालालम्पुर । युगाण्डासँगको हारले निरास बनेका मलेसियाका नेपाली दर्शकमामाझ आइतवार उमंग छायो । सिंगापुरलाई ठूलो अन्तरले हराउँदा दर्शक दिर्घाबाट ‘नेपाल-नेपाल’ को चर्को ध्वनी गुन्जिन्थ्यो । यस्तो अबस्थामा नेपाली टीमले घरेलु मैदानमा खेलेझैं अनुभव गर्यो ।
लाखौंको संख्यामा मलेसियामा नेपालीहरु रहे पनि खेल मैदान पुग्न त्यति सहज छैन् । तैपनि सयौं किलोमिटर यात्रा गरेर बायोमास ओभल मैदान पुगेका नेपाली दर्शकमध्ये धेरैले हातमा नेपाली झण्डा बोकेका थिए भने केही झण्डा अंकित टिसर्टमा सजिएका थिए ।
आइतबार मलेसियामा सार्वजनिक विदा परेका कारण पनि कि्रकेटका पारखीहरुलाई सजिलो भयो । केही कम्पनीमा काम गर्ने श्रमिकहरु बस नै रिजर्व गरेर त्यहाँ आइपुगेका थिए । सिंगापुरलाई ठूलो अन्तरले हराएपछि खुसीले उफ्रदै र नाराबाजी गर्दै मैदानबाट बाहिरिंदा नेपालीहरुको क्रिकेटप्रेमी मलेसियालीमाझ छताछुल्ल भएको थियो ।
नेपालको नाम चम्काउन लागिरहेका खेलाडीलाई भेटेर फोटो खिच्ने यीमध्ये धेरैको ध्येय थियो ।
केही महिनाअघि मलेसियामै भएको एसीसी प्रिमियर लिगमा पनि नेपालीहरुको उपस्थीति उलेख्य थियो । तर, मलेसियाकै खेलमा समेत मलेसियालीहरु दर्शकहरु नगन्य नै थिए ।
केही नेपालीहरु पछिल्ला तीनवटै खेलको दर्शकदीर्घामा देखिए । हामीले सोध्यौं- यसरी खेल हेर्दै हिडन कम्पनीले दिन्छ ? उनीहरुले भने- ‘नेपालको खेल हेर्न कम्पनीबाट बिदा लिएरै बसेका हौं ।’
खेल सकिएपछि खेलाडीहरुले ‘यो नेपाली शीर उचाली संसारमा लम्किन्छ’ गाउँदा मैदान नै गुञ्जायमान भएको थियो ।
आजको जितसँगै नेपाल अंक तालिकामा दोस्रो स्थानमा छ । अघिल्लो बर्ष न्यूजिल्याण्डमा खराव प्रर्दशन गरेपछि घटुवामा परेको नेपाल फेरि डिभिजन २ मा बढुवा हुने अबस्थामा पुगेको छ ।
प्रतियोगितामा प्रथम र दोस्रो हुने डिभिजन २ मा बढुवा हुनेछन् भने अन्तिमका दुई टीम डिभिजन ४ मा घटुवा हुनेछन् । 
