साहरुखले भने सलमानलाई ‘धन्यवाद’, सुध्रिएकै हो त सम्बन्ध ?

सिनेमाको प्रचारका लागि कानपुर पुगेका साहरुख खान फ्यानहरुलाई अभिवादन गर्दै

बलिउड नायक साहरुख खानले आफ्ना दुश्मन सलमान खानलाई ‘धन्यवाद’ दिएका छन् । साहरुख खान यतिबेला आफ्नो नयाँ चलचित्र ‘ह्याप्पी न्यू इयर’को प्रचारमा व्यस्त छन् । साहरुखको यो सिनेमाले पहिलो सातामा करिब १५९ करोड कमाइसकेको छ । ओभरसिजमा सिनेमाको व्यापार करिब ६० करोड पुगेका भारतीय संचारमाध्यमले जनाएका छन् ।

सिनेमाको प्रचारमा व्यस्त साहरुखले कोलकत्ता पुगेर सलमानलाई धन्यवाद दिएका हुन् । सलमानले साहरुखको यो सिनेमाको प्रचार चर्चित रियालिटी शो ‘बिग बोस’मा गरेका थिए । साहरुखले भने-‘म उनलाई ‘धन्यवाद’ भन्न चाहन्छु । हाम्रो मिडियामा आएजस्तो कुनै पनि नराम्रो सम्बन्ध छैन । हामी एक अर्कालाई भेट्दा सिनेमाको बारेमा धेरै कुरा गर्छौ । उनी राम्रा मान्छे हुन् ।’ सलमानले साहरुखको यो भनाइमा कुनै प्रतिक्रिया दिएका छैनन् ।

सन् २००८ बाट बिग्रिएको दुई खानको सम्बन्ध अहिले सुध्रिएको देखिन्छ । एकअर्काको कुरा काट्ने यी दुइ खानले अहिले विभिन्न तरिकाले साथ दिइरहेका छन् ।