विश्वकै अहिलेसम्मै होचा मानिसको रुपमा गिनिज बुकमा नाम लेखाएका नेपालका चन्द्रबहादुर डाँगी र सबैभन्दा अग्ला मानिस टर्कीका सुल्तान कोसेनबीच पहिलो पटक भेट भएको छ ।
१ फिट अग्ला ७५ वर्षीय डाँगी र ८ फिट ३ इन्च अग्ला ३१ वर्षीय सुल्तानले एक आपसमा ऐतिहासिक भेट गर्दै हात मिलाएका हुन् । ‘गिनिज वर्ल्ड रेकर्डस् डे’को अवसरमा आयोजित कार्यक्रममा भाग लिन तथा गिनिज बुक अफ वर्ल्ड रेकर्डसको ६० औँ वर्षगाँठका अवसरमा बेलायतको लण्डनस्थित सेन्ट थोमस अस्पतालमा यी दुइबीच भेट भएको हो ।
चन्द्रबहादुर र सुल्तानबीच पहिलोपटक भेट भएसँगै यी दुइ किर्तिमानी पुरुषले अब एक अर्काबीच सम्पर्क बढाउने योजना पनि बनाएका छन् ।
सुल्तानले भनेका छन्-‘मलाई आशा छ अब हामी साँच्चीकै असल मित्र बनेका छौँ र सँगै धेरै चिज गर्छौँ ।’ साथै सुल्तानले अब आफुले चन्द्र बहादुरलाई टर्कीमा बोलाउने भन्दै आफ्नो निम्तो उनले स्विकार गर्ने आशा समेत व्यक्त गरेका छन् ।
चन्द्र बहादुरलाई भेट्न पाउँदा आफुलाई निकै खुसी तथा आश्चर्य लागेको उनले बताए ।
पेशाले खेतीकिसानी गर्ने सुल्तानले सन् २००९ मा विश्वको सबैभन्दा अग्लो जिवित मानिसको रुपमा गिनिज बुकमा नाम दर्ज गरेका हुन् । उनी अघि चीनका सी शु विश्वको सबैभन्दा अग्लो मानिसको रुपमा थिए ।
सुल्तान विश्वको सबैभन्दा ठूलो हत्केला भएका मानिस पनि हुन् । उनको नाडीदेखि माझीऔंलाको टुप्पोसम्मको लम्बाइ ११.२२ इन्च छ ।
जबकी चन्द्रबहादुर भने विश्वमा मानव इतिहासमा अहिलेसम्मकै सबैभन्दा होचा मानिस हुन् र उनको उचाइ साढे २१ इन्च मात्रै छ ।
सुल्तान भन्छन्-‘चन्द्र बहादुर होँचा छन् र म अग्लो छु तर हामी दुबैले जिन्दगीभर गरेको संघर्ष समान छ । जब मैले चन्द्रको आँखामा हेरेँ उनी असल मान्छे हुन् भन्ने लाग्यो ।’
चन्द्र बहादुरको खुसी पनि बेग्लै छ । ‘म नेपालको सानो ठाउँमा थुनिएको थिएँ । अहिले विश्वभर तथा सबैमाझ चिनिएको छु । विश्वका सबै मानिसले म सबैभन्दा होँचो मानिस हुँ भन्ने जानेका छन् । त्यसैले म निकै खुसी छु ।’
भ्रमण गर्नु आफ्नो जीवनभरको सपना भएको भन्दै उनले लण्डनमा आउन पाउँदा आफू गौरवान्वित भएको र सुल्तानसँगको आफ्नो भेट विशेष रहेको उनी बताउँछन् ।
‘विश्वमा नेपालको प्रतिनिधित्व गर्न पाउँदा मलाई अति नै गर्व लाग्छ । मैले पाएको समर्थनका कारण म निकै खुसी छु’- चन्द्रबहादुर भन्छन् ।
एजेन्सीको सहयोगमा
