कतारमा ज्यान गुमाउने नेपाली कामदारको सम्झनामा स्मारकको प्रस्ताव

२३ मंसिर, काठमाण्डौ । सन् २०२२ को विश्वकप फुटबल आयोजना गर्न लागेको कतारमा विश्वकप फुटबल आयोजनाका लागि भौतिक संरचना निर्माणका क्रममा अहिलेसम्म झण्डै १ हजार जना आप्रवासी कामदारले ज्यान गुमाएका छन् । अहिलेसम्म कतारमा ज्यान गुमाउने १ हजार विदेशी कामदारमध्ये ४ सय जना नेपाली कामदार नै रहेका छन् ।
भोट खरीदको आलोचित भैरहेकोे विश्व फुटबल महासंघ फिफाको कतारमा विश्वकप फुटबल आयोजना गर्न दिने निर्णय झन पछि झन विवादमा पर्दै गएको छ ।
कतार विश्वकपको भौतिक संरचना निर्माणका क्रममा ज्यान गुमाएका र सन् २०२२ सम्ममा ज्यान गुमाउन सक्ने नेपाली कामदारहरुको सम्झनामा एक स्मारक बनाउने ब्यङग्यात्मक प्रस्तावले संसारको ध्यान तानेको छ ।
वन विक वन प्रोजेक्ट द्वारा प्रस्तावित टावर स्मारकमा ज्यान गुमाउने हरेक कामदारको लागि एउटा ठूलो ढुंगा स्थापित गरिनेछ । ज्यान गुमाउने कामदारको संख्या बढ्दै जाँदा उक्त स्मारक टावरको उचाइ पनि बढ्दै जानेछ र क्रेनको सहायताले स्मारकमा ढुंगा थप्नुपर्नेछ अबस्था आउने अनुमान गरिएको छ ।

सन् २०२२ सम्ममा विश्वकप संचरना निर्माणका क्रममा ज्यान गुमाउने कामदारको संख्या उच्च रुपमा बढेका उक्त स्मारक टावर विश्वकै सबैभन्दा अग्लो टावर समेत बन्न सक्ने अनुमान फस्टकोडिजाइन डट कमले गरेको छ । मृत्युको यहीँ दर कायम रहेमा सन् २०२२ सम्ममा विश्वकप संरचना निर्माणको क्रममा ४ हजार आप्रवासी कामदारले ज्यान गुमाउने अनुमान गरिएको छ ।
यो टावरको डिजाइन नै भयानक देखिन्छ । हरेक तहमा आठवटा ढुंगा राखिएको हुनेछ, अर्थात् एउटा तह ८ जना मृतक कामदारको लागि समर्पित गरिने योजना छ । यो टावरको भित्रपट्टीबाट हेर्दा एक आपसमा जोडिएका इँटाहरु आकाशतर्फ ढल्किएको जस्तो आकार देखिनेछ ।

‘यो संरचनाले नेपाली तथा भारतीयका साथै अन्य देशका परिवारलाई समेत श्रद्धान्जली अर्पण गर्ने ठाउँ प्रदान गर्नेछ’, यो प्रस्तावित संरचनाका आर्किटेक्टले आफ्नो वेबसाइटमा लेखेका छन् ।
तर, वास्तवमा यो केवल कल्पनाको काम हो र यसलाई कतार सरकारले कहिल्यै निर्माण सम्भावना छैन ।