‘जिहादी गतिविधि रोक्न’ सरकारले बन्द गर्यो ३० वेबसाइट

सरकारले ३० वटा हाइ प्रोफाइल वेबसाइट बन्द गरिदिएपछि भारतमा तरंग उत्पन्न भएको छ भने प्रयोगकर्ताहरु आक्रोसित बनेका छन् ।

जिहादी गतिविधिको प्रचार रोक्न भन्दै भारतको टेलिकम विभागले ती वेबसाइटहरु बन्द गराएको थियो ।

सरकारले बन्द गराएका वेबसाइटको सूचीमा चर्चित भिडियो साइटदेखि अनलाइन डेभलपरहरुका लागि रिसोर्स सेन्टरका रुपमा काम गर्ने बिशुद्ध प्राबिधिक प्रकृतिका साइट पनि छन् ।

धेरै लोकपि्रय यस्ता साइट बन्द गरिदिएपछि भारतका नेटिजन्सहरुले आक्रोश ब्यक्त गरेका छन् ।

तिब्र दबाबपछि बन्द गरिएका ४ वेबसाइट विब्ली, भिमिओ, डेली मोसन र गिथहब पुनः खुल्ला गरिएको बीबीसीले जनाएको छ ।

सरकारको कानून पालना गरेमा बन्द गरिएका अन्य साइटहरुमाथिको प्रतिबन्ध फुकुवा गरिने सरकारले जनाएको छ । यसरी बन्द हुनेमा अमेरिकाको ‘आर्काइभ डटओआरजी’ जस्तो आर्काइभ साइट पनि परेको छ जसले बिश्वभरका वेबसाइटको भण्डार गर्ने गर्छ ।

भारतका सूचना तथा संचार मन्त्रीले एक विज्ञप्तीमा राष्ट्र विरोधी समूहहरुले भारतीय युवाहरुलाई जिहादी गतिविधिमा लाग्न उत्प्रेरित गर्नका लागि सोसल मिडिया साइटहरुको प्रयोग गरेको दाबी गरेका छन् ।

वेबसाइट बन्द गराउने तथा अनलाइन सामाग्रीमाथि चेतावनी जारी गर्ने मामिलामा भारत अग्रस्थानमा आउँछ । सन् २०१२ को अगष्टमा भारतले एकसाथ २ सय ४५वटा वेबसाइट बन्द गराएको थियो ।