२३ पुस, काठमाडौं । अमेरिकी विकास नियोग (युएसएआईडी)ले नेपालमा ऊर्जा विकासको लागि सहयोग गर्न अमेरिकी सरकार तयार रहेको बताएको छ ।
युएसएआईडीका मिसन डाइरेक्टर वेथ डनफोर्ड नेतृत्वको टोलीले ऊर्जामन्त्री राधा ज्ञवालीलाई भेटेर नेपालमा ऊर्जा विकासको लागि वित्तिय तथा प्राविधिक सहयोग गर्न तयार रहेको बताएको हो ।
नेपाल विद्युत प्राधिकरणको खण्डीकरण, विद्युत ऐन, नियमन, आयोग लगायतका विषयहरुमा आवश्यक सहयोग गर्न इच्छुक रहेको मिसनले जनाएको छ ।
भेटमा ऊर्जा मन्त्री ज्ञवालीले ऊर्जाको क्षेत्रमा अमेरिकी सरकारको सहयोग आवश्यक रहेको बताइन् । उनले नेपालमा प्रशारण लाइन विस्तारमा मुख्य समस्या भएकाले यसमा सहयोग गर्न अनुरोध गरेकी थिइन् ।
सो अवसरमा मन्त्री ज्ञवालीले नेपालमा हाल भईरहेका विद्युत व्यापार सम्झौता, पञ्चेश्वर आयोजनालगायतका विषयमा पनि युएसएआईडीको टोलीलाई जानकारी गराएकी थिइन् ।