पहिचानयुक्त संविधान बन्नेमा शंका : प्रचण्ड

७ फागुन, काठमाडौं । पहिचानसहितको संघीयता र संघीयता सहितको संविधान बनाउन सरकारलाई दवाव दिन भन्दै आन्दोलन घोषणा गरेका एमाओवादी अध्यक्ष प्रचण्डले त्यस्तो संविधान बन्नेमा भने शंका व्यक्त गरेका छन् ।

उनले जनपक्षीय र परिवर्तनकामी संविधान निर्माणका लागि आ-आफ्नो ठाउँबाट एकजुट भई खबरदारी गर्न सबैलाई अपिल गरेका छन् ।

‘पहिचानमा आधारित संविधान निर्माण गर्ने जनअपेक्षामा गम्भीर आशंका उत्पन्न भएको छ,’ शेर्पा समुदायले मनाउने नयाँ वर्ष ग्याल्पो ल्होसारको अवसरमा विहीबार शुभकामना सन्देश दिँदै प्रचण्डले भनेका छन् ।

संविधान निर्माणको काम संगीन घडीमा पुगेको उनले बताएका छन् । उनले ‘जनपक्षीय, परिवर्तनकामी संविधान निर्माणका लागि आ-आफ्नो ठाउँबाट एकजुट भई खबरदारी गर्न’ आह्वान समेत गरेका छन् ।

धार्मिक आस्थाका साथसाथै सामाजिक सदभावका रुपमा समेत मनाइने ल्होसारले देशमा पहिचानसहितको संविधान निर्माण र समृद्धि स्थापना गर्ने प्रेरणा मिल्ने विश्वास प्रचण्डले गरेका छन् ।