बलिउडमा केही समय अगाडि निर्माण भएको चलचित्र ‘भाग् मिल्खा भाग्’सँग केही हदसम्म मिल्दोजुल्दो नाममा नेपाली चलचित्र बन्ने भएको छ । संगीतकार चेतन सापकोटा कार्यकारी निर्माता रहेको चलचित्रको नाम ‘भाग् सानी भाग्’ राखिएको छ ।
शनिबारबाट छायांकनमा जान लागेको यो चलचित्रमा लेखन तथा निर्देशन नवल नेपालको रहनेछ । चलचित्रको शिर्ष भूमिकामा नायिका केकी अधिकारी देखिदैछिन् । आज काठमाण्डौमा आयोजना गरिएको कार्यक्रममा बोल्दै नायिका अधिकारीले यो चलचित्रमा आफू भागिरहने बताइन् । यो कुनै दौडको कथा नभएर नारीप्रधान चलचित्र भएको केकीको भनाई थियो ।
यस्तै, निर्देशक नवल नेपालले चलचित्र क्षेत्रमा जब संकट पर्छ तब आफूहरु नै अगाडि सर्नुपर्छ भन्दै यो चलचित्रलाई कमेडी बिषयमा बनाउन लागेको बताए । चलचित्रमा केकीका साथमा सविन श्रेष्ठ, निर शाह, लय संग्रौला, रमेश वुढाथोकी, गिता अधिकारी, रविन्द्र खड्का, विष्णु सापकोटाको मुख्य भूमिका रहनेछ ।
रंगिन सपना बोकेर आ-आफ्नो गाउँबाट शहर पसेका एक जोडी युवा युवतीको संघर्षको कथालाई चलचित्रले मनोरञ्जनात्मक तबरले प्रस्तुत गर्ने निर्माता समेत रहेका चेतन सापकोटाले बताए । उनले एउटा ‘सानी’लाई पनि आफ्नो जिन्दगी जिउने अधिकार हुने भएकाले दर्शकले चलचित्र हेरेपछि आफूहरुलाई स्याबासी दिने बताए ।
चलचित्रमा सहदेव गौतम र विलोल पोख्रेल निर्माताको रुपमा छन् । साथीभाई फिल्मस्का लागि बिष्णु चापागाँइको प्रस्तुतीमा बन्न लागेको यो चलचित्रमा कविराज गहतराजको नृत्य, हिमाल केसीको एक्सन, दिव्यराज सुवेदीको छायांकन रहनेछ ।
चलचित्र घोषणा कार्यक्रममा नायिका केकी अधिकारी भाग्दै आइपुगेकी थिइन् । निर्माणपक्षले कार्यक्रमलाई केही रोचक बनाउनका लागि केकीलाई उनकै भूमिकाको शैलीमा प्रस्तुत गरेको थियो ।
