१० चैत,बागलुङ । एकीकृत नेकपा माओवादीका स्थायी समिति सदस्य देवेन्द्र पौडेलले सहमतीय संविधान बनाउने सुनिश्चितासहित संविधानसभाभित्र बनेको प्रश्नावली समिति खारेज भए आन्दोलनका कार्यक्रम फिर्ता हुने बताएका छन् ।
क्रान्तिकारी पत्रकार सङ्घ बागलुङले आज आयोजना गरेको पत्रकार भेटघाटमा उनले दलबीच सहमति जुटाउन एमाओवादी लचक बन्दै आए पनि सत्तापक्षीय दलका अडानका कारण सहमति हुन नसकेको टिप्पणी गरे ।
विगतका आन्दोलन, विभिन्न पक्षसँग भएको सहमति, सम्झौता र अन्तरिम संविधानको गति र भावनाअनुसारको संविधान बन्नुपर्ने नेता पौडेलको भनाइ छ । रासस