हिमग्याप लामाको अभियानले सयभन्दा बढी शव जलायो

२६ जेठ, काठमाडौं । भूकम्पमा परी मृत्यु भएका व्यक्तिको शव दाहसंस्कारमा आर्थिक सहयोग गर्दै आएका चलचित्र निर्देशक हिमग्याप लामाको एकल अभियानले अहिलेसम्म एक सय ६ जनाको शव जलाएको छ ।

वैशाख १२ को विनाशकारी भूकम्पपछि निर्देशक लामाले व्यक्तिगत रुपमा सुरु गरेको अभियानले पशुपति आर्यघाटमा पुर्‍याइएका बेवारिसे शव तथा खर्च बिहीन अवस्थामा पुगेका आफन्तलाई शव दाहसंस्कारका लागि आर्थिक सहयोग गर्दै आएको छ ।

पछिल्लो समय भूकम्पमा घाइते भई उपचारका क्रममा मृत्यु भएकाहरुको समेत शव दाहसंस्कारमा लामाको अभियानले सहयोग गरिरहेको छ । यसका साथै अन्य विभिन्न कारणले मृत्यु भएका र आर्थिक समस्या भएका परिवारका आफन्तको शव दाहसंस्कारमा पनि लामाले सहयोग गर्दै आएका छन् ।

पछिल्लो डेढ महिनाको अवधिमा एक सय ६ वटा शवको दाहसंस्कारका लागि आर्थिक सहयोग गरेको लामाले बताए । यसक्रममा, गएको आइतबार २४ गते ‘डग मदर’ को उपनामले परिचित ज्ञानी देउलाको शव दाहसंस्कारमा पनि लामाले सहयोग गरेको लामाको अभियानलाई साथ दिइरहेका नृत्य निर्देशक कमल खालिङ्गले जानकारी दिए ।

काठमाडौंको कमलादीस्थित गणेश मन्दिरमा बस्दै आएकी देउलाले सडकका भूस्याहा कुकुरहरुलाई पालन पोषण गर्दै आएकी थिइन् । यसका साथै, सिन्धुपाल्चोकको कर्थली गाविसमा केही समय अघि भएको अमेरिकी हेलिकोप्टर दुर्घटनामा परी मृत्यु भएका स्थानीइ पाँच व्यक्तिको शव दाहसंस्कारमा पनि लामाले सहयोग गरेका छन् ।

डीएनए परीक्षणका लागि काठमाडौं ल्याइएका उनीहरुको शव परीक्षणपछि सोमबार पशुपति आर्यघाटमा दाहसंस्कार गरिएको हो । पशुपति आर्यघाटमा शव दाहसंस्कारमा सहयोग गर्दै आएका लामाले यो अभियान दीर्घकालिन रुपमा अगाडि बढाउन चाहेको बताएका छन् । उनको यो अभियानबाट खर्च बिहीन अवस्थामा पशुपति आर्यघाट पुगेका व्यक्तिहरुले राहत महसुस गरेको आर्यघाटका एक कर्मचारीले बताए ।