टीकापुर घटनाबारे के भन्छन् कैलालीका थारु सभासद ?

अनलाइनखबर

२०७२ भदौ ८ गते १५:४२ मा प्रकाशित

८ भदौ, धनगढी । कैलालीको टीकापुरमा भएको हिंसात्मक झडपमा एसएसपिसहित ७ प्रहरी मारिएको घटनाको देशभर तीव्र निन्दा भइरहेको छ । सामाजिक सञ्जालदेखि लिएर चिया पसलसम्म यहि विषयमा बहस चर्किरहेको छ । हामीले ३ ठूला राजनीतिक दलको प्रतिनिधत्व गर्ने कैलालीका ३ थारु सभासदलाई सोध्यौं कैलाली घटनाको जिम्मेवारी कसले लिन्छ ? प्रस्तुत छ उनीहरुको जवाफः

हतियार लैजानु गैरकानुनी हो
बुद्धिसागर चौधरी, नेपाली कांग्रेस

हिजो भएको आन्दोलनको नेतृत्व थरुहट संघर्ष समितिले गरेको हो, त्यसमा मेरो पार्टी नेपाली कांग्रेस संलग्न छैन । थरुहट प्रदेशको माग आजको होइन, २०६४ सालमा अन्तरिम संविधान बनेदेखि नै उठेको हो । दलहरुले प्रदेशको सिमांकन गरेपछि थारुहरुको आन्दोलन व्यापक भएको हो । त्यस क्षेत्रमा थरुहट प्रदेश र अखण्ड सुदूरपश्चिमको माग समानान्तर रुपमा उठिरहेका छन् । हिजो जे घटना भयो त्यो एकदमै दुखद छ । यो अकल्पनीय घटना हो । लोकतन्त्रमा शान्तिपूर्णरुपमा माग राख्ने अधिकार सबैलाई हुन्छ । हातहतियार लैजानु गैरकानूनी हो । मेरो यसमा असहमति छ ।

भारतबाट ४ ट्रक मान्छे आएका छन्

रवनी चौधरी, नेकपा एमाले

मलाई कैलाली घटनाका विषयमा धेरै कुरा थाहा छैन । जति मिडियामा हेरेको छु त्यहि हो । मिडियाले पुलिसको कुराहरु मात्रै लेखेका छन् । मलाई जिल्लाबाट फोन गर्नेहरुले भन्नुभएको छ कि सुरुमा पुलिसले गोली चलाएर ३ जना आन्दोलनकारी मार्‍यो, अनि भिडन्त भएको हो । तर मिडियाले उनीहरुको कुराहरु केहि लेखेको छैन ।

आन्दोलनमा घुसपैठ भएको कुरा पनि सुनेकी छु । इन्डियाबाट ४ ट्रक मान्छे आएका भन्छन् । तर त्यत्रो मान्छे आउञ्जेल प्रहरीले के हेरेर बस्यो त ? उसले सुरुमै नियन्त्रण गर्न सक्नुपथ्र्यो नी । जहाँसम्म यो आन्दोलनको कुरा छ,आन्दोलमा एमालेको संलग्नता छैन । हामी थारु सभासद पनि संघर्ष समितिमा छैनौं र थारु सम्बद्ध एमाले संगठनहरु पनि सहभागी छैनन् ।

घटनाको जिम्मेवारी हामी लिदैनौं
मानबहादुर थारु, एमाओवादी

यो आन्दोलन थारुहरुको थारु कल्याणकारीको नेतृत्वमा भएको हो । विभिन्न पार्टीका मान्छेहरु छन् यसमा । हिजोको घटनाको विषयमा सबै कुरा हामीकहाँ पनि आइपुगेको छैन । सीमांकनको विषयमा अन्यत्र जिल्लामा माग राख्दा सम्वोधन गरियो । तर थारुहरुको जायज माग सम्वोधन गरिएन भन्ने गुनासो छ । थारुहरुको शान्तिपूर्ण आन्दोलनमा गोली चलाइएपछि झडप भएको हो भन्ने सुनेको छु ।

अब यसलाई फौजी ढंगले हल गरेर हुदैन । यसको राजनीतकि निकास खोज्नुपर्छ । आन्दोलनमा घुसपैठ भएको कुरा मलाई थाहा छैन । हिजो जे घटना भयो त्यसको जिम्मेवारी राजनीतिक दलका ठूला नेताहरुले लिनुपर्छ । किनभने उनीहरुले बेलैमा माग पूरा गरिदिएको भए यो अवस्था आउने नै थिएन । त्यसैले घटनाको जिम्मेवारी हामी लिदैनौं ।