१२ कात्तिक, काठमाडौं । झमझम पानी परिरहेको थियो, ललितपुरको बागडोलस्थित मदन विष्टका घरमा सेना, प्रहरी र अन्य कामदारहरु झिटीगुण्टा ओसार-पसार गरिरहेका थिए । कोही बिजुली र आँगन मर्मत सम्भार गरिरहेका थिए त कोही रंगरोगनमा व्यस्त थिए ।
यो दृश्य हो निवर्तमान राष्ट्रपति सर्न लागेको नयाँ आवास गृहको । विहीबार दिउँसो अनलाइनखबरकर्मी यो घरमा पुग्दा पुराना डेरावाल डेरा सरिरहेका थिए भने रामवरण यादवका लत्ता कपडा, दराज र टीनका बाकसहरु सुरक्षाकर्मीले घरमा भित्र्याइरहेका थिए ।
घरबेटी मदन विष्ट अमेरिकामा बसोबास गर्छन् । सो घरमा बस्दै आएका डेरावालले रामवरणका लागि घर खाली गरिदिएपछि सामानहरु शीतलनिवासबाट ओसार्न थालिएको छ ।
खासै सम्भार नगरिएको घरमा रातारात मर्मत सम्भार गरिएको छ । आँगनमा ढुंगा बिछ्याइएको छ भने घरको पुरानो स्वरुपलाई झकिभकाऊ पार्न थालिएको छ ।
विहीबार परेको वर्षाका कारण सामान ओसार-पसारमा समस्या परेको छ । विहीबार साँझसम्म डा. यादव सो घरमा सरिसक्ने तयारी छ ।
निवर्तमान राष्ट्रपति यादवको नयाँ डेरा र पुरानो निजी निवासको दुरी लगभग दुईसय मीटरको दुरीमा छ ।
हेर्नुहोस् थप तस्वीर