विनोद चौधरी र फोर्ब्सका सिइओ रारा ताल पुगेपछि… (फोटो कथा)

नविन अर्याल
६ मंसिर, काठमाडौं । जतिसुकै व्यस्तताका बावजुद पनि अर्बपति विनोद चौधरी बर्षको एकपटक ट्रेकिङमा निस्किन्छन् । उनको ट्रेकिङको रोजाई हुन्छ, नेपालका प्राकृतिक वैभवले भरिपूर्ण हिमालय क्षेत्र । यसपटक उनले रोजे, रारादेखि शे-फोक्सुण्डोसम्मको यात्रा ।

यस पटक चौधरीको ट्रेकिङ अघिल्ला बर्षहरुको भन्दा झनै बिषेश किन थियो भने उनीसँगै थिए, विश्व विख्यात फोर्ब्सका प्रमुख कार्यकारी माईक पेलिस र उनकी श्रीमती मिसी । विश्वका अर्बपतिहरुको बारेमा लेख्ने फोर्ब्स पत्रिकाले नै चौधरीलाई अर्बपति घोषणा गरेको थियो ।

उनीहरुसँगै पूर्व प्रधान सेनापति रुक्माङ्गत कटवाल, चौधरीका अनन्य मित्र सुधिर राई र चौधरी ग्रुपका भाइस प्रेसिडेण्ट मुन लीपनि उनीसँगै आकाश चुम्न निस्किएका थिए, मुगुदेखि डोल्पोको यात्रामा ।

फोर्ब्सका सिइओ माईकलाई नेपाल भ्रमणमा अर्बपति चौधरीले बोलाएका थिए । अक्टुर ३१ तारिखदेखि एक हप्ताको समय उनीहरु सुन्दर प्रकृतिको काखमा रमाए ।

अर्बपति चौधरीले भ्रमणको बेलामा प्रकृतीसँग साक्षात्कार मात्रै गरेनन्, मुगु र डोल्पाका जनताका लागि सामाजिक कल्याणका पाँच परियोजना कार्यान्वयन गर्ने निर्णय पनि लिए, राराको काखमा बसेर ।

अचेल उनी जहाँ पुग्छन्, त्यहाँका वासिन्दाका लागि केही न केही सामाजिक कल्याणका काम गर्ने निर्णय गर्छन् । उनका पछिल्ला गतिविधि हेर्दा यस्तो लाग्छ, अहिले उनी आफ्नो विजनेश साम्राज्य फैलाउनमा भन्दा सामाजिक कल्याणका काममा तल्लिन बन्दैछन् ।

ट्रेकिङबाट फर्किएपछि फोर्ब्स कार्यकारी माईकले एक लेखमार्फत् विनोद चौधरीमाथी टिप्पणी गरे- ‘उनी त भिजिनरी पोलिटिसिएन जस्ता पो रहेछन् ।’