५ वैशाख, काठमाडौं । आफ्नो साना तथा ठूला सवारीको कर तिर्न जाँदै हुनुहून्छ ? अब पहिले जस्तो घण्टौं समय छुट्याएर जानुपर्दैन । सवारीको कर तिर्न जाँदा पाँच ठाउँमा लाइन बस्दै प्रक्रिया पुरा गर्नुपर्ने झन्झट समाप्त भएको छ ।
यातायात व्यवस्था विभागको एकान्तकुनास्थित साना तथा ठूला सवारी कार्यालयले आज आइतबारदेखि कर तिर्ने प्रक्रिलाई सरलीकरण गर्दैछ । कर तिर्ने प्रक्रियाका सबै काउन्टर तथा अधिकारीहरुलाई एकद्वार प्रणलीमा ल्याइएको छ ।
कार्यालयको लेखा शाखा, राष्ट्रय बाणिज्य बैंकको काउन्टर, प्रमाणीरकण गर्ने अधिकारीको कार्यकक्ष र नवीरकण भएको कागज जारी गर्ने काउन्टरलाई एकै प्रणलीमा ल्याएको हो । अब करको मूल्यांकन, बैंक खताका रकम जम्मा गर्ने, कर तिरेको प्रमाणीकरण गर्ने र छाप लगाउने सम्मका सबै प्रक्रियालाई एउटै डेस्कबाट गर्न सुरु गरिएको छ ।
यसअघि कर तिर्न ४ घण्टासम्म लाग्ने गरेकोमा अब १० मिनेटभित्र कर तिर्न सक्ने बनाइएको विभागका प्रवक्ता बसन्त अधिकारीले अनलाइनखबरलाई जानकारी दिए । अब कर तिर्न जाँदा भौचर भर्न लेखापढी बिचौलीयाको भर पनि पर्नुनपर्ने उनको दाबी छ ।
करको मूल्यांकन र क्यास डिपोजिट एकै ठाउँमा रहेको विभागका कार्यालयका अधिकारी गणेश अर्यालले बताए । ‘कर तिर्न जाँदा पनि घण्टौं समय लाग्ने अवस्थालाई अन्त्य गरिएको हो’ प्रवक्ता अधिकारीले भने-‘अब कर तिर्दा सेवाग्राहीलाई ५ ठाउँमा कागज बाकेर हिँडिरहनु पर्दैन ।’
