१९ जेठ, मकवानपुर । उपप्रधानमन्त्री कमल थापाले जनचाहना अनुसार नेताहरु आर्थिक विकास र सम्वृद्धिमा नलागे संविधान टिकाउ नहुने दाबी गरेका छन् । संविधान कार्यान्वयन गर्दै आर्थिक विकासमा लाग्न सबै दललाई उनले आग्रह गरे ।
राप्रपा नेपाल मकवानपुर क्षेत्रनम्वर दुईको क्षेत्रीय अधिवेशनलाई बुधबार कुलेखानीमा सम्वोधन गर्दै थापाले भने, ‘सात सालमा राजा र जनताको प्रयासमा आएको संविधानपछि आधा दर्जन संविधान फालिएका छन् । यो संविधानले पनि जनतामा हाँसो ल्याएन भने यो पनि जनताले फाल्ने छन् ।’
संविधान निर्माण गरी कार्यान्वयन गर्न तथा नेपालको सम्वृद्धिमा लाग्न भनेर जनताले चुनावमा आफूहरुलाई जिताएकाले भोटको सदुपयोग गर्नुपर्ने उनले धारणा राखे ।
राप्रपा नेपालका अध्यक्ष समेत रहेका थापाले अबको राजनीतिमा विद्रोह र आन्दोलन नभएर शान्ति चाहिने बताए । नेपालमा शान्ति, स्थायीत्व र विकास चाहानेहरुका लागि राप्रपा नेपाल एक मात्र विकल्प रहेको पनि उनले दाबी गरे ।
