‘मुद्दा मिलाइ दिन्छु’ भनी ठगी गर्ने अधिवक्ता पक्राउ

२ असार, काठमाडौं । ‘मुद्दा मिलाइ दिन्छु’ भनी ठगी गरेको आरोपमा प्रहरीले अधिवक्ता सञ्जयराज अधिकारीलाई काठमाडौंको बबरमहलबाट पक्राउ गरेको छ ।

झापाको दुवागढी गाविस घर भई काठमाडौँ बस्दै आएकी कृष्णकुमारी ढकालको पुनरावेदन अदालत पाटन ललितपुरमा चलेको ३३ लाख बिगोको चेक अनादर मुद्दामा ‘मुद्दा मिलाइ दिन्छु’ भनी ठगी गरेको आरोपमा महानगरीय अपराध महाशाखाको टोलीले अधिकारीलाई पक्राउ गरेको हो ।

अधिकारीले विभिन्न प्रलोभनमा पारी पाँच लाख रकम लाग्ने भनी पेस्कीस्वरुप एक लाख २५ हजार रकम बुझेकामा मुद्दा हारेपश्चात पीडित महिलाले महाशाखामा उजुरी दिएको महाशाखाका प्रमुख वरिष्ठ उपरीक्षक सर्वेन्द्र खनालले जानकारी दिए ।

रामेछाप कठजोर गाविस घर भई हाल कपन बस्दै डिफेन्स ल फर्म सञ्चालन गर्दै आएका अधिकारीलाई पक्राउ गरी थप अनुसन्धान कारवाहीका लागि महानगरीय प्रहरी परिसर पठाइएको महाशाखाले जनाएको छ ।

प्रहरीले अधिकारीको नाममा आइएमइ गरेको एक लाखको भौचर, मुद्दा मिलाई दिने भनी न्यायाधीशको समेत नाम जोडी रु पाँच लाख रकम चाहिन्छ भनी गरेको वार्तालापको सिडीसमेत प्राप्त गरेको छ ।

उनले तेह्रथुम घर भएका केशव उप्रेतीलाई नक्कली जग्गाको बैना गरी रु दुई लाख ठगी गरेको पनि भेटिएको छ ।