सेनाको कोतबाट रहस्यमय रुपमा अत्याधुनिक हतियार गायब

घटना छानविनका लागि उच्चस्तरीय टोली दिपायल पुग्यो

रामहरी ओझा

२०७३ साउन २४ गते १५:३०

२४ साउन, डोटी । नेपाली सेनाको सुदूरपश्चिम पृतना दिपायलबाट हराएको सट मेसिन गन (एसएमजी) खोजी गर्न नेपाली सेनाको एक टोली आईतवार साँझ हेलिकप्टरमार्फत दिपायल पुगेको छ ।

सुदूरपश्चिम पृतनामा सुरक्षार्थ खटिएको गरुडदल गणको एक टुकडीको हतियार हराएपछि छानबिनका लागि टोली दिपायल आइपुगेको सैनिक श्रोतले जनाएको छ । श्रोतका अनुसार उक्त गरुडदल गणको टुकडीको सटमेसिन गन (एसएमजी) एक थान र त्यसमा लोडेड दुई वटा म्यागजिन हराएपछि नेपाली सेनाभित्र खैलाबैला मच्चिएको छ ।

बिषयले व्यापकता पाईसकेको भएपनि यस बिषयमा पृतनाका सैनिक अधिकारीहरु केही बोल्न चाहिरहेका छैनन् । नेपाली सेनाको व्यारेकभित्रैवाट हतियार हराउने कुराले स्थानीयवासीहरुमा पनि आसंका उव्जाएको छ । हतियार भण्डारण गर्ने कोतको ताल्चा खुलै भेटिएपछि हतियार गन्दा एसएमजी फेला नपरेकाले छानबिन सुरु भएको सैनिक श्रोतको दाबी छ । अत्याधुनिक हतियार सहित सैनिक जवान फरार भएको खबर बाहिर आएपनि सेनाले कुनै पनि सैनिक जवान फरार नभएको दाबी गरेको छ ।

सैनिक टोलीले शनिबार देखि डडेल्धुरा, बैतडी तथा डोटीलगायतका राजमार्गमा सवारी साधन चेकजाँच गरिरहेका छन् । सेना र प्रहरीले सुदुरपश्चिमका मुख्य सडकमा गुड्ने यातायातका साधनहरुमा कडा निगरानीका साथ चेक जाँच थालेको छ ।

सुदूरपश्चिम पृतनापति उपरथी विनोदकुमार श्रेष्ठ केही हप्तादेखि विदेश भ्रमणमा भएकाले हतियार हराएको बिषयलाई लिएर कैलालीको अत्तरिया स्थित ५ नम्बर बाहिनीका पाँच बाहिनीपति र सहायकरथी रामशरण कार्की छानबिनका लागि सुदूरपश्चिम पृतना आएका छन ।

पृतनाका महासेनानी यम सापकोटा अप्रेशन अधिकृत भएर छानबिन भइरहेको सैनिक स्रोतले जानकारी दिएको छ ।