९ कात्तिक, काठमाडौं । व्यवस्थापिका संसदको अन्तर्राष्ट्रिय सम्बन्ध तथा श्रम समितिले भारतस्थित नेपाली दूतावासको जमिनमुनिबाट मेट्रो रेल सञ्चालन गर्न दिइएको अनुमति सम्बन्धी कागजात सात दिनभित्र उपलब्ध गराउन सरकारलाई निर्देशन दिएको छ ।
समितिको मंगलबार बसेको बैठकले नेपाल-भारत प्रबुद्ध समूहको गठन गर्दा उक्त समूहलाई प्रदान गरिएको कार्यादेशसहित कार्यप्रगतिको लिखित विवरण उपलब्ध गराउन पराराष्ट्र मन्त्रालयलाई निर्देशन दिएको हो ।
बैठकले सो विषयका लागि परराष्ट्र मन्त्रालयको स्पष्ट धारणा आवश्यक भएकाले आगामी बैठकमा अनिवार्य उपस्थित हुनसमेत निर्देशन दिइएको छ ।
नयाँदिल्लीस्थित नेपाली दूतावास भवन मुनिबाट छिन-छिनमा मेट्रो रेल दौड्ने गरेको छ । र, रेल आएपिच्छे भवन थर्किने गर्दछ । जसका कारण दूतावास भवन चर्किएर असुरक्षित बनेको छ ।
