७ पुस, काठमाडौं । तपाईं सरकारी कर्मचारी हुनुहुन्छ र लामो समयसम्म विदा बस्ने योजनामा हुनुहुन्छ ? त्यसो हो भने विदाको पूर्वजानकारी निजामती किताबखानालाई गराउनुहोला ।
निजामती किताबखानाबाट विदाको विवरण अध्यावधिक भएपछिमात्रै विदा स्वीकृत गर्ने प्रक्रिया सामान्य प्रशासन मन्त्रालयले थालेको छ ।
यसअघि निजामती कर्मचारीले त्यस्तो अध्ययन, असाधारण विदा लिँदा त्यसको रेकर्ड निजामती किताबखानाले राख्ने गरेको थिएन ।
असाधारण विदामा बस्ने कर्मचारीको विवरण रेकर्ड नहुँदा एउटै कर्मचारी पटक-पटक विदामा बस्ने समस्या दोहोरिएपछि यस्तो प्रयास गर्न लागिएको सामान्य प्रशासन मन्त्रालयले जनाएको छ ।
मन्त्रालयले त्यसका लागि रेकर्ड सिस्टम बनाएर कार्यान्वयन गर्न निजामती किताबखानालाई निर्देशन पनि दिएको छ ।
विदामा बस्नुपूर्व नै रेकर्ड राख्नुपर्ने विषयमा मन्त्रालयले एक वर्षअघि नै निर्णय गरेपनि कार्यान्वयनमा आएको थिएन । एक बर्षपछि मन्त्रालयले उक्त निर्णयलाई कार्यान्वयन गर्न लागेको हो ।