२१ पुस, काठमाडौं । सरकारले ताप्लेजुङको खोक्लिङमा हत्या गरिएका बनरक्षक गणेशबहादुर शाहीलाई शहीद घोषणा गर्ने भएको छ । साथै उनको परिवारलाई १० लाख रुपैयाँ आर्थिक सहायता पनि दिने भएको छ ।
जाजरकोट स्थायी घर भएका शाहीको १७ पुसमा खोक्लिङ गाविस-४ मा खुकुरी प्रहार गरी बिभत्स हत्या भएको थियो ।
बिहीबार बसेको मन्त्रिपरिषद बैठकले कर्तव्य पालनाको सिलसिलामा शाहीको हत्या भएकाले उनलाई शहीद घोषणा गर्ने प्रक्रिया अघि बढाउने र उनका परिवारलाई १० लाख रुपैयाँ आर्थिक सहायता दिने निर्णय गरेको सरकारका प्रवक्ता सुरेन्द्र कार्कीले जानकारी दिए ।
खेल प्रशिक्षक भट्टराईका परिवारलाई पनि १० लाख
यसैगरी बाँकेका खेल प्रशिक्षक बासुदेव भट्टराई र खेलकुद विकास समिति बाँकेका प्रमुख कालिकोट निवासी कर्णबहादुर खड्काको पनि कामको सिलसिलामा मृत्यु भएकाले उनीहरुको परिवारलाई पनि १० लाख रुपैयाँ आर्थिक सहायता दिइने कार्कीले जानकारी दिए ।
