- फाइल तस्वीर
७ माघ, चितवन । परराष्ट्र मन्त्री डा. प्रकाशशरण महतले कूटनीतिक सम्बन्ध सडकमा उठाएर नहुने भन्दै दुई देशबीच टेबलमा बसेर सल्टाउनुपर्ने बताएका छन् ।
शुक्रबार यहाँ पत्रकारहरुसँग कुराकानी गर्दै मन्त्री महतले सडकमा गालीगलौज गरेर कूटनीतिक सम्बन्ध सुध्रिने होइन, बिग्रिने बताए। उनले भने, “समर्थन र विरोध सडकमा गरेर कूटनीति चल्दैन ।”
छिमेकी देश चीन र भारतसँग कुटनीतिक सम्बन्ध सुमधुर हुँदै गएको भन्दै उनले खुल्ला सीमा, डुबान समस्यालगायतका कारण भारतसँग जति समस्या छन्, चीनसँग नरहेको बताउनुभयो । जहाँ बढी समस्या छ, त्यहाँ बढी छलफल हुने भएकाले भारतसँग नजिकजस्तो देखिए पनि दुवै देशसँगको सम्बन्ध समदुरीको रहेको उनको भनाइ थियो ।
चीनतर्फको कोदारी नाका खोल्न चीन सरकार तयार रहेको भन्दै मन्त्री महतले केरुङलाई विस्तार गर्ने विषयमा पनि छलफल भइरहेको बताउनुभयो ।
चिनियाँ राष्ट्रपतिको नेपाल भ्रमणको तयारीका लागि छलफल गर्न सचिवस्तरीय संयन्त्रलाई पत्र लेखिसकिएको पनि उनले बताए।
परराष्ट्रमन्त्री महतले गण्डक सम्झौता कार्यान्वयनका लागि दुई देशका बीचमा सहमति भइसकेको बताए । उनले माघ महिनाभित्र नेपाली पक्षले डीपीआर तयार गरी नहरको पुनःसंरचना निर्माण भारतीय पक्षले गर्ने सम्झौता भएको बताए । सो नहरबाट सम्झौताबमोजिम ४० हजार हेक्टर जमिन सिँचाई हुनुपर्नेमा २५ हजार हेक्टर मात्रै हुँदै आएको मन्त्री महतले बताए ।
रासस
