२८ वैशाख, राजविराज । पूर्वपश्चिम राजमार्गअन्तर्गत सप्तरीको खड्क नगरपालिका–७ मा ट्र्याक्टरको ठक्करबाट मोटरसाइकलमा सवार एक व्यक्तिको आज मृत्यु भएको छ ।
मृत्यु हुनेमा सप्तरीकै डाक्नेश्वरी नगरपालिका–१० बस्ने २४ वर्षीय जगनाथ चौधरी रहेको प्रहरीले जनाएको छ ।
पश्चिमबाट पूर्वतर्फ आउँदै गरेको स१त २०८४ नंको ट्र्याक्टरले विपरीत दिशाबाट जाँदै गरेको स ७ प ७९०० नं. को मोटरसाइकललाई ठक्कर दिएको थियो ।
ठक्करबाट गम्भीर घाइते चौधरीलाई उपचारका लागि लहानस्थित एक अस्पतालमा भर्ना गरे पनि उपचारका क्रममा आज मृत्यु भएको इप्रका, कल्याणपुरले जनाएको छ ।
यता ट्र्याक्टर र चालकलाई प्रहरीले नियन्त्रणमा लिएको छ । यस्तै सप्तरीकै सुरुङ्गा नगरपालिका–१ मा मोटरसाइकल अनियन्त्रित भई दुर्घटना हुँदा तीनजना घाइते भएका छन् ।
गाईघाट–कदमाहा सडकखण्डअन्तर्गत पर्ने सो ठाउँमा गाईघाटबाट लहानतर्फ जाँदै गरेको अन टेस्ट मोटरसाइकल आफैँ अनियन्त्रित भई दुर्घटना भएको हो ।
घाइते हुनेमा मोटरसाइकल चालक सुरुङगा नगरपालिका–१ बस्ने सुलेन्द्रराम मोटरसाइकलको पछाडि सवार सुरेन्द्र राम र चन्द्रजित राम रहेका छन् ।
उनीहरुको लहानस्थित सप्तऋषि अस्पतालमा उपचार भइरहेको इप्रका, भेडियाले जनाएको छ ।
