चितवन माओवादीले भन्यो-एमालेले मतपत्र च्यात्न खोज्यो, रक्षा गर्ने क्रममा केही च्यातिन पुग्यो

१५ जेठ, चितवन । मतपत्र च्यातिएपछि गएरातिदेखि भरतपुर महानगरपालिकाको मतगणना स्थगित भइरहँदा मतपत्र कसले च्यातेको भन्नेबारे नेकपा एमाले र नेकपा माओवादी केन्द्रबीच आरोप प्रत्यारोप सुरु भएको छ ।

नेकपा माओवादी केन्द्र चितवनले सोमबार बिज्ञप्ति निकालेर भरतपुर महानगरपालिकामा मतगणना भइरहेको समयमा मतगणनास्थलमा एमाले कार्यकर्ताले मतपत्र च्यातेको आरोप लगाउँदै घटनाप्रति खेद प्रकट गरेको छ ।

माओवादीका चितवन इञ्चार्ज इश्वरी भट्टराईद्वारा हस्ताक्षरित बिज्ञप्तिमा एमाले कार्यकर्ताले मतपरिणाम प्रभावित पार्ने उद्देश्यले मतपत्र च्यातेको उल्लेख छ ।

आफ्नी उम्मेदवार रेणु दाहाल जिततर्फ उन्मुख भइरहेका बेला एमालेका प्रतिनिधिले मतगणना स्थलमा मतपत्र च्यात्न खोजेपछि आफ्ना प्रतिनिधिले त्यसको रक्षा गर्ने क्रममा केहि मतपत्र च्यातिएको बिज्ञप्तिमा माओवादीको दावी छ ।

चितवन माओवादीले पक्राउ परेका आफ्ना कार्यकर्ता द्रोणबाबु सिवाकोटी र मधु न्यौपानेको तत्काल रिहाई र स्थानीय तह निर्वाचन अनुसार सम्बन्धित मतदान केन्द्रको पुनः मतदान गर्न माग गरेको छ ।

नेपाली कांग्रेसले पनि वडा नम्बर १९ मा पुनः मतदान गर्न माग गरेको छ ।

घटनाबारे नेकपा एमालेले यसअघि नै बिज्ञप्ति निकालेर पराजयको नजिक पुगेपछि माओवादीका प्रतिनिधिले मतपत्र च्यातेको आरोप लगाएको छ र उसले पुनः मतदान नभइ मतगणनाको माग गरेको छ ।

यस्तो छ माओवादी केन्द्रको प्रेस विज्ञप्ति