१९ जेठ, झापा । नेपाली कांग्रेसले झापाको सबै १५ वटै स्थानीय तहमा उम्मेदवारहरुको टुंगो लगाएको छ । लामो रस्साकस्सीपछि कांग्रेसले जिल्लाको सबै स्थानीय तहमा उम्मेदवार टुंगो लगाएको हो ।

यसअघि नै ९ वटा स्थानीय तहमा उम्मेदवारको टुंगो लागिसकेको थियो । बाँकी तहमा केन्द्रीय समितिबाटै उम्मेदवार टुंगो लगाइएको कांग्रेस झापाका सभापति उद्धव थापाले बताए ।

झापाका कुल १५ वटा स्थानीय तहमध्ये एउटा गाउँपालिकाको प्रमुखमा महिलालाई उठाइएको छ । झापाको राजबंशी आदिवासी समुदायबाट ३ वटा प्रमुख पदमा उम्मेदवारी दिइएको छ भने मधेसी समुदाय (साह) ले दुईवटा स्थानीय तहको प्रमुखमा उम्मदेवारी पाएको छ ।

पहाडे जनजाति समुदायबाट चारवटा स्थानीय तहमा उम्मदेवारी दिने कांग्रेसको निर्णय छ । १५ स्थानीय तहमध्ये ६ वटा नगरपालिका प्रमुखमा पहाडे क्षेत्री बाहुन समुदायबाट उम्मेदवारी दिइएको छ ।

जिल्लाको उम्मेदवारी घोषणामा कांग्रेसले जातीय सन्तुलन मिलाएको देखिएको छ ।

८ वटा नगरपालिकामा को-को ?

कांग्रेसले झापाका ८ वटै नगरपालिकाहरुमा उम्मेदवारको टुंगो लगाएको छ ।

केपी ओलीको गृहनगरका रुपमा रहेको दमक नगरपालिकामा कांग्रेसले मेयरमा ढुण्डीराज भण्डारी र उपमेयरमा रेगिना भट्टराईलाई उम्मदेवार बनाएको छ ।

त्यसैगरी बिर्तामोड नगरपालिकाको मेयरमा जलकुमार गुरुङ र पार्वता गिरीलाई उम्मदेवार बनाइएको छ । भद्रपुर नगरपालिकाको मेयरमा गणेश पोख्रेल र तारादेवी भुर्तेललाई उम्मदेवार बनाइएको छ ।

मेचीनगर नगरपालिकाको मेयर र उपमेयरमा विमल आचार्य र दूर्गादेवी खतिवडालाई उठाउने कांग्रेसले निर्णय गरेको छ ।
कन्काइ नगरपालिकाको मेयरमा एकराज उप्रेती र उपमेयरमा कविता बस्नेत उम्मेदवार बनेका छन् ।

त्यस्तै गौरादह नगरपालिकाको मेयर र उपमेयरमा रोहितकुमार साह र सुमित्रा खरेल ढुंगेल उम्मदेवार बनेका छन् । शिवसतासी धाम नगरपालिकामा पर्शुराम ढुंगाना मेयर र जयकुमारी चेम्जोङ उपमेयरमा उठेका छन् ।

अर्जुनधारा नगरपालिकामा कांग्रेसले हेमराज खरेल र सरस्वती सिटौला गोलेलाई मेयर र उपमेयरको उम्मेदवार बनाएको छ ।

७ गाउँपालिकामा को-को ?

कांग्रेसले कमल गाउँपालिकाको अध्यक्ष र उपाध्यक्षमा हुकुमसिंह राई र दीपा गौतमलाई टिकट दिएको छ । हल्दीबारी गाउँपालिकामा दिलिपकुमार माबो र चन्द्रकला राईले कांग्रेसबाट टिकट पाएका छन् ।

बुद्धशान्ति गाउँपालिकामा रमेश भुजेल र चन्द्रकला भट्टराईले कांग्रेसबाट टिकट पाएका छन् । गौरीगञ्ज गाउँपालिकामा कांग्रसले महिलालाई प्रमुख पदमा उठाएको छ । त्यहाँ फुलवती राजबंशीले अध्यक्षको टिकट पाएकी छिन् भने उपाध्यक्षमा दिपेन्द्र थापालाई उम्मदेवार बनाउने निर्णय कांग्रेसले गरेको छ ।

बाह्रदशी गाउँपालिकामा प्रमुख र उपप्रमुख दुबैजना राजबंशी समुदायबाट उठाइएको छ । त्यहाँ प्रमुखमा खड्गप्रसाद राजबंशी र उपप्रमुखमा रत्ना राजबंशीले टिकट पाएका छन् ।

झापा गाउँपालिकामा कांग्रेसबाट जयनारायण साह र बसुन्धरा थपलियाले अध्यक्ष र उपाध्यक्षको टिकट पाएका छन् । त्यस्तै कचनकवल गाउँपालिका प्रमखमा कालेन्द्रप्रसाद राजबंशी र उपप्रमुखमा गीता ओडारी खरेललाई नेपाली कांग्रेसले उम्मदेवार बनाएको छ ।