बिहीबार, ७ असार, २०७५
Ruslan
OnlineKhabar.com
Suzuki
Advertisment
SKIP THIS
Advertisment
SKIP THIS

‘कांग्रेस आत्तिएको छैन, अर्को एउटा गलत प्रयोग हुने चिन्ता मात्र हो’

Suzuki
अनलाइनखबर

दुई कम्युनिस्ट घटकले चुनावी तालमेल मात्र होइन, कांग्रेसमा एक प्रकारको छटपटी देखिन्छ । कतिपय नेताको अभिव्यक्ति सुन्दा धेरै आत्तिएको अनुमान गर्नेहरु पनि छन् ।

तर, कांग्रेसका बौद्धिक नेता महेश आचार्यले यो एकतालाई कसरी हेरिरहेका छन् ?  मध्य बानेश्वरस्थित आफ्नै निवासमा अनलाइनखबरसँग कुराकानी गर्दै आचार्यले भने, ‘कांग्रेस आत्तिएको होइन र छैन । चिन्ता यति मात्र हो, कम्युनिस्ट पार्टीहरुको एकताले मुलुकलाई फेरि राजनीतिक ध्रुवीकरणतिर लैजाने त होइन ?’

प्रस्तुत छ, अनलाइनखबरका लागि उपेन्द्र पोखरेल र राजकुमार श्रेष्ठले गरेको कुराकानी-

एमाले र माओवादीको मिलनपछि अब कांग्रेस सिद्धियो भन्ने बुझाइ कतिपयमा देखिन्छ । अब कांग्रेस सिद्धिएकै हो ?

त्यो होइन । नेपालका सबै कम्युनिस्ट र राजाको शक्ति एक ठाउँमा हुँदा पनि कांग्रेस एक्लैले लोकतान्त्रिक आन्दोलनको निरन्तर अगुवाई गरेकै हो । र, नेपालमा लोकतन्त्र स्थापनाको निम्ति भूमिका निर्वाह गरेको पार्टी हो । त्यसैले कांग्रेस कुनै पनि अवस्थामा सकिने पार्टी होइन ।

उसो भए दुई वामपन्थी दल चुनावी तालमेलसँगै एकता गर्दा कांग्रेसमा रुवाबासी किन त ?

नेताहरुले व्यक्तिगत रुपमा भनेका टिप्पणीहरुलाई टिपेर हामीले धारणा बनाउनु हुँदैन । कांग्रेसको आधिकारिक धारणा के मात्र हो भने अहिले चुनावी तालमेल गर्ने र भोलि एउटै कम्युनिस्ट पार्टी बनाउने, नेपालमा साम्यवाद ल्याउने भनिएको छ ।

हाम्रो चिन्ता यति मात्र हो, साम्यवाद ल्याउने सपनामा समाज गहिरो विभाजनतिर जान्छ । जबकि, १०/११ वर्षको द्वन्द्व, राजाको प्रत्यक्ष शासन भोगेपछि भएको ०६२/६३ को आन्दोलनपछि हामीले सबै राजनीतिक पार्टीहरु भूमिका सुरक्षित गर्दै अगाडि बढ्ने मुल राजनीतिक बाटो तय गरेका थियौं । धेरै ठूलो उथलपुथलपछि जारी भएको संविधानले पनि फेरि एक पटक राष्ट्रिय सहमति बनाउने र लोकतन्त्रको आधारभूत मान्यता बलियो बनाएर राजनीतिक बहस, विभाजनमा अम्झिने होइन । देशलाई समृद्धिको दिशामा लैजानुपर्छ भन्ने बाटो कोरेको थियो । यो बाटो खलबल हुन्छ कि भन्ने चिन्ता हो ।

कम्युनिस्टहरु एक ठाउँमा छन् भन्ने चिन्ता हुँदै होइन । के मात्र भनेको हो भने फरक विचार भएका पार्टीहरु एकै ठाउँमा बसेर सहकार्य गर्ने ठाउँबाट कम्युनिस्टहरुको एकतामा जाँदा समाज विभाजित हुन्छ

दोस्रो, कम्युनिस्टहरु एक ठाउँमा आउने र नेपालमा साम्यवाद ल्याउने भनिएको छ । यसको अन्तर्राष्ट्रिय आयाम पनि छ । संसारमा साम्यवादको कठोर प्रयोग असफल हुँदै गएको र त्यसबाट धेरै ठूलो पीडा ती मुलुकका जनताले भोगेको सन्दर्भमा नेपालमा फेरि साम्यवाद ल्याउने र सत्तामा कम्युनिस्टहरुको एकलौटी वर्चश्वको चाहनाबाट सिर्जना भएको चिन्ता मात्र हो ।

यसमा हाम्रो पार्टीको थप चासो के पनि हो भने नेपालमा धेरै किसिमका मतभेदले समाजमा विभाजन खडा गरेको छ । हामी विस्तारै त्यस्तो द्वन्द्वलाई सवैधानिक प्रक्रियाबाट निराकरण गर्ने बाटोमा गइरहेका बेलामा अर्को एउटा तीव्र धु्रवीकरण र यसको टकराहटबाट सिर्जना हुने द्वन्द्वले लोकतान्त्रिक पद्धतिलाई आघात पुर्‍याउँछ । म तपाईंहरुको माध्यमबाट देशभरका युवापुस्तामाझ यो बहस पुगोस् भन्ने चाहन्छु । नेपालको ठूलो संख्या १८ देखि ४०/४५ वर्ष उमेर समूहमा छ र उनीहरुको एजेन्डा नेपाल अब राजनीतिक सिद्धान्तको बहसमा अल्भिmने कि समृद्धिको बाटोमा जाने भन्ने हो ।

धेरै मानिसले एकता भने पनि यो चुनावी तालमेल मात्र हो भनिरहेका छन् । तर, तपाईं यो मान्न मान्नुहुन्न र एउटै कम्युनिस्ट पार्टी बनाउन खोजेको हो भन्ने बुझ्नु भएको छ ?

मैले मान्नु/नमान्नु अनुमानको कुरा गर्नु हो । तर, उहाँहरुले आधिकारिक रुपमा भन्नु भएको छ, अहिले यो चुनावी गठबन्धन हो र कम्युनिस्ट एकताको बाटो हो । दुई पार्टीका अध्यक्षहरु रहेको संयोजन समिति पनि बनाइसक्नु भएको छ ।

बरु, बाबुरामजीको मत म भन्न सक्दिनँ । किनकि, उहाँले अब म कम्युनिस्ट रहिनँ भन्नु भएको थियो । तर, दुई पार्टीले त कम्युनिस्ट शक्ति बनाउने भनेकै छन् ।

अहिले पनि त दुवै कम्युनिस्ट पार्टी नै हुन्, सरकारमा पनि बेलाबेलामा सहकार्य गरेका हुन् । फेरि उनीहरुले अधिनायकवाद ल्याउने भनेका पनि छैनन् । संविधानले नै समाजवाद उन्मुख समाज भनेको छ, त्यसलाई कार्यान्वयन गर्छौं भनेका हुन् । त्यसलाई सत्ताकब्जा, अधिनायकवाद भनेर किन धेरै आतंक सिर्जना गर्ने ?

यो आतंक होइन । उहाँहरु सबै एकै ठाउँमा हुँदा पनि आतंकित नभई हामीले लोकतान्त्रिक आन्दोलनलाई अगाडि बढाएकै हो । म के मात्र भन्दैछु भने बृहत राष्ट्रिय सहमति र सहकार्यको बाटो कोरिसकेपछि कम्युनिस्ट वर्चश्वको पार्टी निर्माण र त्यस्तो वर्चश्व भएको राजनीतिमा जाने हो भने समस्या सिर्जना हुन सक्छ ।

भन्दा त अधिनायकवाद ल्याउँछौं भनेर कसले भन्छ र ? तर, सोच र प्रवृत्ति हेर्दा सहिष्णुताको तह हेर्नुभयो भने अहिले एमाले एक्लैले गरिराखेका राजनीतिक टिप्पणीहरुले समाजमा रहेका द्वन्द्वको समाधानभन्दा बढाउने खालका छन् ।

संविधान संशोधनको मुद्दा हेर्नुस्, लचिलो भएर सबैलाई मिलाउनेभन्दा पनि बेवास्ता गर्ने बाटो हिँड्यो । कांग्रेसले अहिले पूर्वाग्रहले भन्यो भन्न सक्नुहन्छ । तर, हिजोसम्म माओवादी आफैं भनिरहेको थियो, एमाले प्रतिगामी सोच भएको, संविधान संशोधन गरेर सबैलाई समेटौं भन्ने सोच नरहेको भनेर ऊसँगको सहकार्य तोडेर संविधान संशोधन गर्नुपर्ने राजनीतिक निर्णय गरेको दल हो ।

तपाईंले भनेको ठीक हो । तर, तपाईंहरुसँग सहकार्य गरे पनि त मधेस मुद्दा सम्बोधन भएन र अब एमालेबिना यो सम्भव छैन भन्ने त प्रष्ट भइसक्यो । अब उसले एमालेसँग सहकार्य र एकता गरेर मधेस मुद्दा सम्बोधन गराउन पनि त सक्छ नि ?

एमालेलाई समायोजन गरेर ल्याउने हैसियतमा यो एकीकरण भएको तपाईंले देख्नु भएको छ र ? ६० र ४० को अनुपातमा जानु भनेको त क्रमिक रुपमा माओवादीको विलय हो । त्यो पनि यस्तो शक्ति, जसले संसदीय प्रणाली खतम भयो भनेर हतियार उठाएको र शान्ति प्रक्रियामा आएपछि पनि संविधान निर्माण गर्दासम्म ऊ एउटा पक्ष थियो । राज्य पक्षसँग शान्ति सम्झौता गर्‍यो । त्यत्रो ठूलो ११ वर्षे द्वन्द्वको प्रतिनिधि पार्टी आज एमाले र उसको राजनीतिक कोर्समा गएर विलय हुँदैछ । अब कथित जनयुद्धको वारेस बोक्ने पार्टी पनि हुने छैन । जबकि, द्वन्द्वकालीन मुद्दाहरु समाधान भएका छैनन् । सत्य निरुपण तथा मेलमिलाप र बेपत्ता छानविन आयोग क्रियाशील छन् ।

तर, माओवादीले तपाईंहरुसँग सहकार्य गर्दा पनि त शान्ति प्रक्रियामा यही आयोग क्रियाशील छ भन्नुबाहेक त केही छैन नि ?

हो । यसमा कैले केही आपत्ति जनाएको छैन । र, कम्युनिस्टहरु एक ठाउँमा छन् भन्ने चिन्ता हुँदैन भन्ने होइन । के मात्र भनेको हो भने फरक विचार भएका पार्टीहरु एकै ठाउँमा बसेर सहकार्य गर्ने ठाउँबाट कम्युनिस्टहरुको एकतामा जाँदा समाज विभाजित हुन्छ ।

कि प्रदेश र प्रतिनिधिसभा चुनावको पूर्वसन्ध्यामा दुई ठूला वाम घटकको गठबन्धन बनेको छ । नेपालमा वामपन्थी जनमत ६२ प्रतिशत छ पनि भनिन्छ । हिजो कांग्रेस र माओवादी मिल्दा अब एमाले पाँच वर्ष सत्ता राजनीतिबाट बाहिर हुनेभयो भनिन्थ्यो । आज ठीक उल्टो कांग्रेसलाई त्यही डरले पो सताएको हो कि ?

हरेक राजनीतिक पार्टीले चुनाव तथा चुनावअघि र पछाडिको पोजिसन के हुने भनेर सोच्ने तथा आफ्नो प्रभाव कसरी विस्तार गर्ने भनेर सोच्नु या रणनीति बनाउनु स्वाभाविक हो । संवैधानिक प्रक्रिया हो, पार्टीहरु मिल्छन् वा विलय हुन्छन् । तर, कम्युनिस्ट पार्टीहरुको एकतामा केही अस्वाभाविकता छ, त्यसैले त धेरै जना छटपटाइरहनु भएको छ । अब के हुन्छ भन्ने चासो त सबैको देखियो । कतिपयले राजनीतिक मुद्दाहरु समाधान भयो भनेका छन् भने कतिपयले होइन कम्युनिस्ट भर्सेस गैरकम्युनिस्टहरुको ध्रुवीकरण अझ बढ्छ भनेका छन् ।

यस्तो बहस त भइरहन्छ । हिजो कांग्रेस र माओवादी सत्ता गठबन्धनमा आउँदा पनि त कतिपय मानिसले विचार, एजेन्डा केही नमिल्नेहरु कसरी मिले भनेकै थिए नि ?

कम्युनिस्ट एकता गर्ने उद्देश्य बोकेको पार्टीको प्रतिनिधिले गृह मन्त्रालय सम्हाल्नु भएको छ । उहाँको बफादारिता कता हुन्छ ? साम्यवाद ल्याउने उद्देश्यले एकतातर्फ गएको पार्टीको पक्षमा राज्यका स्रोतहरुको दुरुपयोग गर्ने लालसाबाट मुक्त हुनुहुन्छ ?

त्यसका सीमित कारणहरु थिए । मधेसको समस्या समाधान भएको थिएन, त्यसलाई सम्बोधन गछौर्ं, चुनाव अनिश्चितजस्तो थियो, त्यो गर्छौ भनेर तीनबुँदे सहमति नै भएको थियो, माओवादीसँग । नयाँ पार्टी बनाउँछौं भनेका त थिएनौं नि ।

अहिले सहकार्यको आयाम पृथक छ । कम्युनिस्टहरुको एउटै पार्टी बनाउने र साम्यवादतिर जाने सोचले समाजलाई विभाजित गर्छ भन्ने मात्र हाम्रो चिन्ता हो । उनीहरुले शासकीय प्रणाली नै परिर्वतन गरेर प्रत्यक्ष निर्वाचित राष्ट्रपतीय प्रणालीमा जान्छौं भनेपछि त्यसले अनिश्चतताको ढोका खोलेको छ । संसारका यस्ता थुप्रै मुलुक छन्, कार्यकारी अधिकार राष्ट्रपतिमा राख्दा उनीहरु अधिनायकवादी भएका छन् । नेपालकै इतिहास हेर्नुभयो भने पनि राजाको समग्र कार्यकाल पनि त एउटै व्यक्तिमा केन्द्रीत शासन थियो नि ।

शासकीय स्वरुप परिवर्तन गर्न संविधान संशोधन गर्नुपर्छ, जसका लागि दुई तिहाइ चाहिन्छ । चुनावमा जाँदा यसलाई मुद्दा बनाएर दुई तिहाइ नहुने अवस्था बनाए भइहाल्यो नि 

त्यसैले त हामी भनिरहेका छौं, हामी छौं, चिन्ता गर्नुपर्दैन । तर, एउटा गलत प्रयोग हुन आँटिरहेको आशंका त सिर्जना भएको छ । म त्यो मात्र संकेत गरिरहेको छु ।

यसले आगामी चुनावलाई चाहिँ कति असर गर्छ ?

अलिकति असर त गर्ला । बाँडिएको मत एक ठाउँमा आउँछ भनेर सीधा अंकगणितीय विश्लेषण गर्नेहरुले अनुमान लगाएर फरक पर्छ भन्न सक्छन् । म त्यसभन्दा परका तथ्यहरु पनि देख्छु । यो भनेको आक्रामकताको प्रयोग अझ बढी हुनसक्छ ।

कम्युनिस्टहरु उग्रतातिर जाने र कार्यकर्ता पंक्तिले त्यही आक्रमकता देखाए शान्तिपूर्ण र निष्पक्ष चुनावको प्रक्रिया प्रभावित हुनसक्छ । कम्युनिस्ट एकता गर्ने उद्देश्य बोकेको पार्टीको प्रतिनिधिले गृह मन्त्रालय सम्हाल्नु भएको छ । उहाँको बफादारिता कता हुन्छ ? साम्यवाद ल्याउने उद्देश्यले एकतातर्फ गएको पार्टीको पक्षमा राज्यका स्रोतहरुको दुरुपयोग गर्ने लालसाबाट मुक्त हुनुहुन्छ ? कार्यकर्ताको मनोविज्ञानमा आएको अग्रतालाई सम्मिलित गर्ने ढंगले राज्य संयन्त्र परिचालन भए भने निर्वाचनको परिणाम प्रभावित हुनसक्छ । यस्तो चुनाव भयो भने नयाँ द्वन्द्व नेपालको राजनीतिमा आउँछ ।

उसो भए गृहमन्त्रीले राजीनामा दिनु उपयुक्त हुन्छ ?

प्रतिपक्षमा बसेको दलसँग एउटै पार्टी बनाउँछु भनेर हिँडेको छ र सत्तामा बसेर साझेदार भएको छ । यो अस्वाभाविक छ । पार्टीको प्रतिनिधि भएका नाताले उहाँको बफादारिता स्वाभाविक रुपमा पार्टीका एजेन्डाहरु प्रति पनि हुन्छन् । सरकारमा बसेपछि संवैधानिक सीमाभित्र बस्नुपर्ने बाध्यता पनि छ । स्वार्थहरुबीच द्वन्द्व हुन्छ । छाड्ने/नछाड्ने त उहाँको राजनीतिक नैतिकताको निर्णय अरुले गरिदिएर हुँदैन ।

सत्ता साझेदार भएकाले छाड्नुस् त भन्न सक्नुहुन्छ नि ?

होइन, अस्वाभाविक लागेको छ । यही कुरा सारा देशले भनिरहेको छ ।

परिस्थितिको ट्याकल कसरी गर्छ त कांग्रेसले ?

कांग्रेसले यो मुद्दाको बलियोसँग प्रतिवाद गर्छ । यो राष्ट्रिय सहमतिको बृहत अवधारणालाई हामी मर्न दिँदैनौं र कांग्रेससँग यो सामथ्र्य छ भन्ने म गम्भीरतापूर्वक राख्छु । किनभने, वामपन्थीहरु पञ्चायतको आवरणमा संगठन विस्तार गर्दा पनि राजतन्त्रको ज्यादतीविरुद्ध हामीले एक्लै लडेको हो । वामपन्थीहरुलाई पनि लोकतान्त्रिकरण गर्ने जिम्मेवारी लिएर काम गरेका हौं । पार्टीगत रुपमा क्षति व्यहोर्‍यौं तर सहकार्यमार्फत् नै एमालेको उग्रतालाई कम गरेको हो । माओवादी द्वन्द्वमा ठूलो संख्यामा कांग्रेसका साथीहरुको जीवन गुम्यो तर हामीले मुलुकको हितमा उनीहरुलाई शान्ति प्रक्रियामा ल्यायौं ।

फेरि पनि कांग्रेसको काँधमा लोकतन्त्रका आधारभूत मान्यताहरुको रक्षा गर्ने र राष्ट्रिय एकतालाई मजबुत गर्ने दोहोरो जिम्मेवारी आएको छ । यसका लागि लोकतन्त्रमा विश्वास गर्ने, राष्ट्रिय एकतालाई संवर्द्धन गर्नुपर्छ भन्ने र मुलुकलाई प्रगतिशील विचारधारामा लैजानुपर्छ भन्ने सोच राख्ने शक्तिहरुलाई एक ठाउँमा ल्याउनुपर्छ ।

कांग्रेस चुनावका लागि चाहिँ कति तयार छ ? महाधिवेशन भएको लामो समयसम्म संगठन लथालिंगजस्तै छ । नेतृत्व पनि यो चुनावमा जसोतसो अहिलेकै जस्तो अवस्था कायमै राख्ने र माओवादीसँग मिलेर सरकार बनाउने भन्ने थियो । एमाले-माओवादी मिल्न सक्छन् भनेर नसोचेको देखिन्छ 

तपाईंले भनेको मान्छु, संगठनात्मक कमजोरीहरु छन् । विश्लेषणमा पनि कहिँकहिँ त्रुटी भएकै हो, घटनाक्रम हामीले अनुमान गरेभन्दा पृथक ढंगले विकसित भएकै हो । यसबाट पर्ने अन्योल छँदैछ । यो होइन भन्नु मूर्खता हुन्छ । त्यसैले अहिले हामी पार्टीका बैठकहरुमा यही कमजोरीहरु सच्याउन खोजिरहेका छौं ।

चुनावलाई प्रभावमा पार्ने गरी कांग्रेसका केही आन्तरिक कमिकमजोरी छन् । त्यसको व्यवस्थापन गर्नुपर्छ । जस्तो- पार्टीभित्र एकता कायम गर्ने जिम्मा पार्टी सभापतिको काँधमा छ । उहाँले नेतृत्व पनि गर्नुपर्छ । यो निर्णायक नेतृत्व गर्दा न्यायपूर्ण निर्णयहरु लिनसक्नुपर्छ । जसरी राष्ट्रिय राजनीतिमा मेलमिलापको भावना आवश्यक छ, हरेक पार्टीभित्र पनि त्यो हुनुपर्छ । पार्टी नेतृत्व पंक्तिमा पनि यस्तो भावना आउनुपर्छ ।

अर्को, उम्मेदवार छनोटको मुद्दा छ, भएका नेताहरुलाई जिम्मेवारी दिने कुरा छन् । नयाँ कल्पनासहित नयाँपुस्ताका नेताहरु आएका छन्, उनीहरुको ऊर्जालाई मिसाउनुभयो भने ऐतिहासिक ‘इनर्जी’मा नयाँ सिनर्जीको प्रारम्भ हुन्छ ।

हाम्रो राज्य संरचना फेरिएको छ । तर, राजनीतिक दल र नेताहरुको मानसिकता अझै केन्द्रीकृत बेलाको जस्तै छ । देश संघीय संरचनामा गइसकेपछि कांग्रेसले पनि कतिपय निर्णय त स्थानीय र प्रादेशिक तहमै हुनदिनुपर्‍यो । यसले प्रतिकुल परिस्थितिसँग कसरी लड्ने भनेर तलबाटै उपाय खोज्छ ।

हामीले एक्लैजस्तो चुनाव लड्नुपर्ने भयो । अरु लोकतान्त्रिक शक्तिहरुसँग चुनावी तालेमल गर्नु पर्छ । यसका लागि पनि समय छैन । त्यसैले कामको जिम्मेवारी बाँडफाँट गरौं र चुनावमा होमिनुपर्छ । अब हामी चुनाव सार्न सक्दैनौं र सार्न पनि हुँदैन ।

वाम एकताले कांग्रेसका कार्यकर्ता स्तब्धजस्तो देखिएका छन् । उनीहरुको मनोबलचाहिँ कसरी उकास्नुहुन्छ ?

मेरो विचारमा त्यस्तो छैन होला । कलिकति चिन्ता त बढ्छ किनकि यो अस्वाभाविक बाटोमा गएको छ । तर, हामीले यस्तो प्रतिकुल परिस्थिति यसअघि पनि बेहोरेकै हो ।

म साथीहरुलाई भन्न चाहन्छु, कम्युनिस्ट घटकहरु हामीसँग नहुँदा, हामीलाई प्रधान शत्रु मानेर उनीहरुले दस्तावेजहरु लेखिरहँदा र त्यसबेलाको राज्यसत्ता हाम्रोविरुद्ध हुँदा पनि हामीले लोकतान्त्रिक आन्दोलनलाई लगातार अगाडि बढाएका थियौं । र, कांग्रेसको त्यो ऐतिहासिक भूमिकालाई जनताले कहिल्यै बिर्सिंदैनन् ।

एजेन्डाहरु चाहिँ के बनाउनुहुन्छ ?

राष्ट्रवादको कुरा पटक-पटक आउँछ । गलत बुझाइ भयो नेपालको सन्दर्भमा । यसलाई सच्याउने एजेन्डालाई कांग्रेसले गम्भीरतापूर्वक उठाउँछ । राष्ट्रवाद, राष्ट्रवाद र राष्ट्रवादको कुरा गर्दा पनि अधिनायकवादको पोल्टोतिर जान सक्छ भनेर भारतबाट फर्किंदा बीपी कोइराला र गणेशमान सिंहले भन्नु भएको छ । संसारभर त्यसै भएको छ । हिटलरको उदय राष्ट्रवादको एउटा खुट्टामा उभिएर लोकतन्त्रलाई भष्मेभूत गरिएको हो । मुसोलिनीको उदय राष्ट्रवादकै नाममा भएको थियो ।

वाम एकतापछि लोकतान्त्रिक मूल्य, मान्यता धरापमा पर्छ कि भन्ने चिन्ता सबैतिर देखिएको छ । कांग्रेसको भूमिका के हो ? सत्तामा जाने वा प्रतिपक्षमा बस्ने यान्त्रिक भूमिका छ, बृहत एजेन्डाको रक्षा गर्ने पनि हो । त्यो ऐतिहासिक सन्दर्भको कुरा गर्न चाहन्छौं । विगत ७० वर्षदेखि हामी लोकतान्त्रिक मूल्य, मान्यताको रक्षा गर्ने पार्टी हो । यो एजेन्डा आज पनि बर्करार छ ।

एजेन्डा त तपाईंहरुसँग धेरै छन् । तर, त्यो मुद्दाहरुलाई जनतामाझ लगेर त्यसलाई भोटमा रुपान्तरण गर्ने ल्याकत कांग्रेस नेतृत्वले राख्छ कि राख्दैन ?

यदि त्यहाँ कमिकमजोरी छन्, सभापतिको भूमिका र नेतृत्वले मात्र पुग्दैन भने सबै नेतृत्वपंक्तिले सहयोग गर्नुपर्छ । हाम्रो विधानले निर्णय गर्ने अधिकार सभापतिलाई नै दिएको छ । तर, म फेरि पनि भन्छु, सभापतिले गरेको निर्णय न्यायिक र लोकतान्त्रिक हुनुपर्छ । यसरी सामूहिक नेतृत्वको छवि प्रस्तुत गर्न सकिन्छ ।

तपाईंहरुले ठीकै कुरा उठाउनु भएको छ । कांग्रेसको समर्थनको आधार ठूलो छ तर त्यो मतदान केन्द्रमा जाँदैन । गएर पनि भोट नखसेको हुन्छ, खसेको मतको पनि रक्षा गर्न सक्नुपर्छ, भलै यो प्राविधिक कुरा हो । त्यसैले चुनावका धेरै आयाम हुन्छ ।

एक-एक मतका लागि अन्तिमसम्म लड्ने जुझारुपन नभएसम्म चुनाव जित्न कठीन हुन्छ ।

२०५६ मा दोस्रो पार्टी हुँदा कृष्णप्रसाद भट्टराईलाई भावी प्रधानमन्त्रीका रुपमा अगाडि सारेर चुनाव लडिएको थियो । यसपटक पनि कांग्रेसले कुनै नेतालाई अगाडि सार्छ कि ?

मलाई लाग्छ, सबै विकल्पमा खुला रहेर छलफल गर्नुपर्छ । कुनै अभियानका रुपमा लिएर जाँदा यसको ‘फलआउट’ अर्कै हुनुसक्छ । तितो टिप्पणी गरेर प्रतिक्रिया आमन्त्रण गर्नुभन्दा ‘लिडरसिप’को मुद्दा के हो, रणनीतिमा कहाँ त्रुटी देखियो, छलफल गर्नुपर्छ ।

२०७४ असोज २२ गते ११:५७ मा प्रकाशित (२०७४ असोज २३ गते ७:११मा अद्यावधिक गरिएको)
Grace
Grace

सम्बन्धित शीर्षकहरु

अनलाइनखबर सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

मुख्य खबरहरु

१ प्रतिकृया प्राप्त
  • Prem Pandey " Man ko sathi" लेख्नुहुन्छ    |   २०७४ असोज २२ गते १३:४४

    एमाले र माओवादीको मिलनपछि अब कांग्रेस सिद्धियो भन्ने बुझाइ कतिपयमा देखिन्छ । अब कांग्रेस सिद्धिएकै हो ?
    उसो भए दुई वामपन्थी दल चुनावी तालमेलसँगै एकता गर्दा कांग्रेसमा रुवाबासी किन त ?

    9
    3
    Share

यसमा तपाइको मत




फेसबुकबाट तपाईको प्रतिक्रिया

Also you may like this