२१ मंसिर, बिराटनगर । संघीय समाजवादी फोरमका अध्यक्ष उपेन्द्र यादवले बिराटनगरबाट मतदान गरे । मतदानका क्रममा संक्षिप्त प्रतिक्रिया दिने क्रममा यादवले आगामी दिनमा समानुपातिक र प्रत्यक्षतर्फको निर्वाचनसमेत छुट्टाछुट्ै मितिमा गर्नुपर्ने बताए ।
‘यो निर्वाचन सामान्य छ, तर प्रतिनिधिसभा, प्रदेशसभा र समानुपातिक चुनाव एकैचोटि हुँदा मतदाताहरुलाई अलि कठिनाइ र थप समय लागेको देखिन्छ,’ यादवले भने, ‘यसलाई अलग–अलग गर्नुपर्छ आउने दिनहरुमा ।’
सप्तरी २ बाट प्रतिनिधिसभाको चुनाव लडिरहेका यादवले भने– ‘प्रतिनिधिसभाको अलग्गै, प्रदेशसभाको अलग्गै, अनि संसदको चुनाव भइसकेपछि चाहिँ समानुपातिकको चुनाव हुनुपर्छ ।’
अहिलेको चुनाव केही उल्टोपाल्टो भए पनि यसले देशलाई निकास दिने यादवले बताए । उनले भने– ‘अलिकति उल्टोपाल्टो त छ, तथापि के हो भने निर्वाचन हुँदैछ, यो नै ठूलो कुरा हो ।’
