१५ पुस, ताप्लेजुङ । गुरुङ समुदायले मनाउने तमु ल्होसार पर्व तप्लेजुङमा भने सबै जातजातिको सहभागितामा मनाइएको छ ।
गुरुङहरुको नयाँ वर्षका रुपमा मनाइने तमु ल्होसार विषेश कार्यक्रममा ताप्लेजुङमा भने लिम्बु समुदायले धान नाच र च्याबु्रङ नाच पनि प्रस्तुत गरिएको छ ।
सदरमुकाम फुङ्लिङस्थित तोक्मेडाँडाको सैनिक व्यारेकको प्राङ्गणमा भएको कार्यक्रममा लिम्बु, ब्राहृमण, क्षेत्री समुदायका स्थानीयको उपस्थिति देखिएको थियो ।
एक जातिले मनाउने पर्वमा अर्को जातिको पनि उपस्थिति रहे पर्वको महत्व र आकर्षण बढ्ने हुँदा सबैलाई कार्यक्रममा आमन्त्रण गरिएको हर्कराज गुरुङले बताए ।
सबै धर्म र जातिले मनाउने चाड पर्वमा सबैको उपस्थिति भए सामाजिक सद्भाव कायम हुने भएकाले ल्होसारमा च्याब्रुङ नाच प्रस्तुत गरिएको स्थानीय ज्ञानु फुरुम्बोले बताए ।
शुक्रबारबाट सुरु भएको ल्होसार विषेश कार्यक्रममा गुरुङ समुदायको परम्परागत खेलसहित भाले झार्ने, डोरी तान्ने लगायतका खेलको समेत आयोजना गरीएको थियो ।