२६ चैत, काठमाडौं । प्रहरीले सुनसरीको इस्टर्न सुगर मिलका वित्त प्रबन्धक बृजमोहन गुप्ता पक्राउ गरेको छ ।
किसानसँग उखु खरिद गरेवापत भुक्तानी गर्नुपर्ने झण्डै ४४ करोड रुपैयाँ नदिएपछि उनलाई पक्राउ गरिएको प्रहरीले जनाएको छ ।
सुनसरीका डीएसपी नारायणप्रसाद चिमोरियाले किसानलाई भुक्तानी रकम किन नदिएको हो भन्ने बारेमा जानकारी दिन कार्यालयमा ल्याइएको जानकारी दिए । उक्त चिनी उद्योगले चैत १० गते २२ गतेभित्र किसानको रकम भुक्तानी सुरु गर्ने प्रतिवद्दता व्यक्त गरे पनि भुक्तानी नगरेपछि प्रहरीले उद्योगीलाई पक्राउ गरेको हो ।
केही दिनअघि उद्योग, वाणिज्य तथा आपूर्ति मन्त्री मातृकाप्रसाद यादवले किसानको रकम भुक्तानी नगर्ने उद्योगीलाई कारवाही गर्ने चेतावनी दिएका थिए ।
चिनी उद्योगीहरुले भने आयातित चिनीमा भन्सार दर नबढाएसम्म भुक्तानी नगर्ने अड्डान लिँदै आएका छन् । इस्टन सुगर मिलसहित झण्डै दर्जन चिनी उद्योगले किसानको करोडौं रकम भुक्तानी रोकेका छन् ।
