१८ वैशाख, काठमाडौं । काठमाडौं उपत्यकासहित मुलुकको पहाडी क्षेत्रमा केही दिनदेखि नियमितजसो वर्षा भएको छ ।
विहान आकाशमा डम्म बादल लाग्ने, कहिले घाम चर्किने र दिउँसोतिर असिनासहित पानी आउने गरेको छ । पानी परिसकेपछि एकैछिनमा मौसम खुलेर घाम लाग्ने पनि गरेको छ ।
अहिले प्रिमनसुन सिजन भएकाले केही दिनदेखि जारी यस्तो मौसमी गतिविधि सामान्य रहेको मौसम पूर्वानुमान महाशाखाले जनाएको छ ।
‘अहिले प्रिमनसुन पिरियड भएकाले प्राय यस्तै हुन्छ’ मौसम पूर्वानुमान महाशाखाका मौसमविद राजु प्रधानांगले भने ‘अहिले तल्लो वायुमण्डलमा न्युनचापीय प्रणाली सक्रिय छ भने माथिल्लो वायुमण्डलमा पश्चिमी वायु सक्रिय छ, त्यसैले गर्दा पहाडी क्षेत्रमा वर्षा भइरहेको छ ।’
पहाडी क्षेत्रमा वर्षा उच्च पहाडी र हिमाली क्षेत्रमा हिमपात पनि भएको छ । तर तराई क्षेत्रमा भने वर्षा भएको छैन । वर्षा भएको क्षेत्रमा पनि ठूलो भएको छैन । हल्का र मध्यम खालको वर्षा मात्र भएको मौसमविद प्रधानांग बताउँछन् ।
यो क्रम केही दिन अझै रहने मौसमविदको भनाइ छ । कहिलेसम्म जारी रहन्छ अहिले नै भन्न नसकिने प्रधानांगले बताए । ‘हामीले तीन दिनसम्मको वर्षाको अवस्था हेरेपछिमात्र भन्न सक्छौं, अहिले नै मौसम कहिलेदेखि सफा हुन्छ भन्नेबारे केही थाहा हुँदैन’ उनले भने ।
