२६ वैशाख, काठमाडौं । पेरिस सेन्टजर्मेन (पीएसजी)ले फ्रेन्च कपको उपाधि जितेको छ । मंगलबार राति लेस हर्बियर्सलाई २-० ले हराउँदै पीएसजीले उपाधि उचालेको हो ।
पीएसजीले यसअघि लिग वान र फ्रेन्च लिग कपको पनि उपाधि जितेको थियो ।
फ्रेन्च कपको उपाधि जित्ने क्रममा जिओवानी र एडिसन काभानीले गोल गरे । २६ औं मिनेटमा जिओवानीले गोल गर्दै पीएसजीलाई सुरुआति अग्रता दिलाएका थिए । २५ यार्डबाट जिओवानीले गरेको सशक्त प्रहार गोलमा परिणत भएको थियो ।
दोस्रो हाफमा पीएसजीले गरेको एउटा गोललाई रेफ्रीले मान्यता दिएनन् । तर, ७४ औं मिनेटमा काभानीले पेनाल्टीमार्फत गरेको गोलले पीएसजीलाई उपाधी दिलायो ।
चोटका कारण फाइनल खेल नखेलेका नेइमार उपाधि उचाल्ने बेला भने जर्सी लगाएर सहभागी भएका थिए ।
लेसका क्याप्टेनले पनि उचाले उपाधि
हारे पनि लेसले खुशीका साथ प्रतियोगिता सकिएको बताएको छ । लेसका क्याप्टेनले समेत पीएसजीको क्याप्टेन थियगो सिल्भासँगै उपाधि उचालेका थिए ।
घरेलु लिगको तेस्रो डिभिजनको क्लबले विश्व चर्चित खेलाडी रहेको पीएसजीसँग ७३ हजार दर्शकसामु फाइनल खेल्नु आफैमा खुसी र गर्व गर्नलायक रहेको लेसको प्रतिक्रिया छ । यो उसका लागि इतिहासमै ठूलो उपलब्धी मानिएको छ ।
पीएसजीले फ्रेन्च कपमा सन् २०१४ यताका सबै खेल जित्दै आएको छ ।