२७ वैशाख, काठमाडौं । राजधानी काठमाडौंबाट बिहीबार प्रकाशित भएका राष्ट्रिय दैनिक पत्रिकाहरुले विविध विषय उठाएका छन् । पत्रिकाका पहिलो पृष्ठमा आज राजनीतिसँग सम्बन्धित सामग्री बढी भए पनि आर्थिक, सामाजिकलगायतका मुद्दाहरुलाई पनि पत्रपत्रिकाहरुले समेटेका छन् ।
एमाले–माओवादी एकता प्रक्रियामा देखिएका गाह्रा–साह्रा केही पत्रिकाले आज खोतलेका छन् । कान्तिपुर दैनिकले ‘ओली–दाहाल खटपट’ शीर्षकमा पहिलो पृष्ठमा खबर लेखेको छ । समाचार अनुसार, प्रधानमन्त्री केपी ओलीले मंगलबार पूर्वप्रधानमन्त्रीको हैसियतमा बजेटसम्बन्धी छलफलमा बोलाएपछि माओवादी केन्द्रका अध्यक्ष प्रचण्ड झस्किएका छन् । सत्तासाझेदार दलका हैसियतले बजेटमा छलफल हुने अपेक्षा गरेका प्रचण्ड ओलीको छलफलमा औपचारिकता पूरा गरेर फर्किएका छन् ।
दुई अध्यक्षबीचको गाँठोले वाम एकता घाम पानीजस्तै भएको विश्लेषण राजधानी दैनिकमा छ ।
भारतीय प्रधानमन्त्री नरेन्द्र मोदीको नेपाल भ्रमणबारे लेख्दै आइरहेका पत्रपत्रिकाहरुले आज पनि यो विषयलाई छुटाएका छैनन् । राजधानी दैनिकले व्यवस्थापिका संसदमा भ्रमणबारे भएको सवाल–जवाफलाई आधार बनाएर समाचार बनाएको छ भने नागरिक दैनिकले ‘मोदीलाई जेड तहको सुरक्षा’ शीर्षक दिएर खबर लेखेको छ । मोदीको सुरक्षाकै विषयमा खबर लेखेको नयाँ पत्रिकाले हतियारसहितका ६६ भारतीय सुरक्षाकर्मी परिचालित हुने जनाएको छ ।
यसका अतिरिक्त राजधानी काठमाडौंको पानी अभावदेखि २ महिनामै साढे ६ अर्ब सक्ने खेलसम्मका खबरलाई आजका पत्रपत्रिकाहरुले महत्त्वका साथ प्रकाशित गरेका छन् ।
हेरौं आजका पत्रपत्रिकामा प्रकाशित भएका महत्त्वपूर्ण एवं राेचक घाेचक खबरका सारसंक्षेप
२ महिनामा ६ अर्ब सक्न सांसदको दबाव
सांसद्हरुले चालु आर्थिक वर्षभित्र खर्चने गरी निर्वाचन क्षेत्र विकास कार्यक्रम शीर्षकको ५० लाख र निर्वाचन क्षेत्र पूर्वाधार विशेष कार्यक्रम शीर्षकको ३ करोड रुपैयाँ बजेट तत्काल निकासा गराउन सरकारमाथि दबाव बढाएको कान्तिपुर दैनिकमा खबर छ ।
आर्थिक वर्ष २०७४/७५ सकिन २ महिना मात्रै बाँकी हुँदा सांसदहरुले यही अवधिभित्र खर्च गर्न उक्त रकम निकासा खोजेको समाचारको सार छ ।
समाचार अनुसार निार्वचन क्षेत्र पूर्वाधार विशेष कार्यक्रमका लागि ४ अर्ब ९५ करोड र निर्वाचन क्षेत्र विकास कार्यक्रमका लागि १ अर्ब ६७ करोड छुट्याउनुपर्ने हुन्छ ।
ओली एक्लौटी अघि बढ्दा प्रचण्ड रुष्ट
बजेटबारे प्रधानमन्त्री केपी शर्मा ओलीले सत्तासाझेदार दल माओवादीसँग छलफल नगर्दा प्रचण्ड सशंकित बनेका छन् ।
कान्तिपुर दैनिकका अनुसार बजेट मात्रै होइन, राष्ट्रिय योजना आयोगमा नियुक्तिलगायत महत्त्वपूर्ण निर्णय गर्दासमेत ओलीले प्रचण्डसँग परामर्श गरेका छैनन् ।
प्रचण्डले माओवादीतर्फबाट राष्ट्रिय योजना आयोगका लागि विद्यावारिधि उपाधिप्राप्त दुई व्यक्तिको नाम पनि दिएका थिए । ओलीले तिनलाई राखेनन् । माओवादी सल्लाहबिनै योजना आयोगलार्य पूर्णता दिए । समाचार अनुसार यसले प्रचण्ड रुष्ट बनाएको छ ।
राजनीतिक दबावले अनुगमन ठप्प
राजनीतिक दबावले ललितपुर महानगरपालिकामा अनुगमन रोकिएको छ । महानगरपालिका आर्थिक विकास समितिले डेढ महिनाअघि सातदोबाटोस्थित सेल्सवेरी डिपार्टमेन्ट स्टोरमा अनुगमन गर्ने तय गरेको थियो । तर योजनाअनुसार हालसम्म पनि अनुगमन गरेको छैन ।
कान्तिपुर दैनिकका अनुसार राजनीतिक दबावका कारण सेल्सवेरीमा अनुगमन रोकिएको हो । महानगरपालिकाकै अधिकारीले यो स्वीकारेका छन् । नाम चलेका स्कुल, कलेज, अस्पतालदेखि ठूला सपिङ मल, होटलसम्मले करोडौं रुपैयाँ राजश्व छली गरेका छन् । तर यिनीहरुलाई करको दायरामा ल्याउन महानगरपालिकाले जाँगर चलाएको छैन ।
काम गर्न साउदीमा, खाना खर्च नेपालबाट
वैदेशिक रोजगारदाताको बदमासीका कारण १ नेपाली साउदी अरेबियामा अलपत्र परेका छन् ।
काभ्रे बनेपाका राजकुमार तिमिल्सेना साउदीमा अलपत्र परेका हुन् । उनी अलपत्र परेपछि परिवारले नेपालबाट खाना खर्च पठाइरहेका छन् ।
नयाँ पत्रिका दैनिकका अनुसार इनिसियल साउदी अरेबिया लिमिटेड नामक एक निर्माण कम्पनीमा काम गर्न गएका उनी मंसिरसम्म त्यहीँ कार्यरत थिए । ०७३ मा अन्तिमपटक तलब बुझेका राजकुमारले त्यसयता तलब पाएका थिएनन् । ०७४ मा उनले काम गर्दै आएको कम्पनी बन्द भयो । त्यसपछि कम्पनीका मालिक सम्पर्कविहीन भए । मालिक नै सम्पर्कमा नभएपछि उनी नेपाल फर्कन चाहन्थे तर एक्जिट भिसासमेत लगाउन नपाउँदा उनी स्वदेश फर्किन सकेका छैनन् ।
उनी श्रीमतीले पठाएको खर्चमा बाँचिरहेका छन् ।
मोदीको अभिनन्दन नागरिक नभएर नगर !
भारतीय प्रधानमन्त्री नरेन्द्र मोदीलाई नेपाल भ्रमणको क्रममा गरिने भनिएको अभिनन्दन नागरिक नभएर नगर अभिनन्दन रहेको सरकारले स्पष्ट पारेको छ ।
नागरिक अभिनन्दनका नाममा सामाजिक सञ्जालमा चकोृ आलोचना भएपछि सरकारले नागरिक नभएर नगर अभिनन्दन गर्न लागेको राजधानी दैनिकमा खबर छ ।
संसदको बुधबारको बैठकमा परराष्ट्र मन्त्री प्रदीप ज्ञवालीले यस विषयमा स्पष्ट पारेका छन् ।
बिचौलियाले नै खान्छन् ३ सय प्रतिशत नाफा
राजधानी दैनिकले कृषिउपजहरुमा व्याप्त बिचौलियाबारे समाचार छापेको छ । समाचार अनुसार बिचौलियाले कृषकको सामान सस्तोमा किनेर तीन सय प्रतिशतसम्म नाफा खान्छन् ।
राजधानीका अनुसार किसानदेखि उपभोक्तासम्म पुग्दा तरकारीको मूल्यमा करिब ३ सय प्रतिशत बढी मूल्यान्तर भेटिएको छ । किसानदेखि उपभोक्तासम्म आइपुग्दा पाँचभन्दा बढी तहमा नाफाखोरको जालोका कारण कृषकले कम र उपभोक्ताले बढी मूल्य तिर्नु परिरहेको छ ।
संसद् भवनमा ईश्वरको खोजी !
प्रतिनिधिसभा बैठकमा नेपाल मजदुर किसान पार्टीका सांसद प्रेम सुवालले ईश्वर देखाउन सरकारसँग माग गरेका छन् । बुधबार सरकारले पेश गरेका ३ वटा अध्यादेशलाई अस्वीकृत गर्ने प्रस्ताव पेश गरेका नेमकिपाका सांसद सुवालले संसदमा ईश्वरको खोी गरेका हुन् ।
नागरिक दैनिकका अनुसार, मुख्यतः शपथको भाषामा ईश्वरका नाममा शपथ खानेछु भन्ने प्रावधानप्रति आपत्ति जनाउँदै सरकारले ईश्वर खोजिदिनुपर्ने मा गरेका हुन् ।
‘जब शपथमा देश र जनताको नाममा भनिसकेपछि ईश्व्रको नाममा किन खानुपर्यो ? जसलाई ईश्वर छ भन्ने विश्वास छ त्यसले यहाँ छन् भनेर देखाउनु पर्यो नत्र त्यो प्रावधान हटाउनुपर्यो’, संसदमा सुवालले व्यक्त गरेको भनाइ उद्धृत गर्दै नागरिकले लेखेको छ, ‘नत्र सरकारले ईश्वर खोजेर ल्याइदिनुपर्यो ।’
हेर्नुहाेस् पत्रपत्रिकाका फ्रन्टपेज