३ जेठ, कैलाली । कैलालीका तीनजना युवाले यही जेठ ५ गतेदेखि धनगढी-खप्तडसम्मको साइकल यात्रा गर्ने भएका छन् ।
बिहीबार धनगढीमा पत्रकार सम्मेलनको आयोजना गर्दै लायन्स क्लब अफ कैलाली फारवेष्टले सो कुराको जानकारी दिएको हो ।
क्लबका अध्यक्ष नरबहादुर राईले धनगढी उपमहानगरपालिका २ का विवेक शर्मा र खगेन्द्र सिंह धामी त्यस्तै गोदावरी नगरपालिका ८ मजगाउँका भरतविक्रम शाहीले साइकलमा धनगढीदेखि खप्तडसम्मको यात्रा गर्ने बताए । उनले सम्भवतः पहिलो पटक खप्तडसम्मको एकहप्ते साइकल यात्रामा निस्कने यो टोली पहिलो भएको बताए ।
टोलीका सदस्य शाहीले कैलाली भ्रमण वर्ष मनाइरहदा थालेको साइकल यात्राले आन्तरिक तथा बाहृय पर्यटकलाई समेत टेवा पुग्ने बताए ।
उनले नेपालको स्वर्ग भनेर चिनिले खप्तडको प्रचारप्रसार समेत हुने भएकाले आन्तरिक तथा बाहृय पर्यटकहरुको आगमनमा समेत बृद्धि हुने बताए ।
साइकल यात्राले शारीरिक रुपमा मात्रै नभएर मानसिक रुपमा बलियो बनाउने र वातावरण प्रदुषणमा समेत सहयोग पुग्ने भएकाले सबैलाई सन्देश दिन सकियोस भनेर धनगढी-खप्तड साईकल यात्रा गर्ने सोच बनाएको टोलीका अर्का सदस्य शर्मा र धामीले जानकारी दिए ।
कैलाली जिल्ला खेलकुद विकास समितीका अध्यक्ष दीपक सिंहले कैलालीमा साईकल संघ नभएका कारण साइकलका गतिविधि गर्न नपाएको बताउँदै आगामी दिनमा यो यात्राले साइकल संघ गठन गर्न सहयोग पुग्ने बताए ।
जेठ ५ गते विहान धनगढीको ट्राफिक चौराहाबाट शुरु हुने यात्रा बुडर, भातकाँडा, शिलगडी हुदै ९ गते खप्तड पुग्ने साइकल यात्रीहरुले जानकारी दिएका छन् ।
लायन्स क्लब अफ कैलाली फारवेष्टको सहकार्यमा हुन गैरहेको धनगढी-खप्तड साइकल यात्रीहरुलाई धनगढी जेसिज, एडभेन्चर वेष्ट होलिडेज, कैलाली जिल्ला खेलकुद विकास समिति लगायतको सहयोग रहेको छ ।
