चुम्लिङटार दुर्घटनामा मृत्यु हुनेको संख्या ४ पुग्यो

सडकबाट खसेर त्रिशूली नदी किनारमा पुगेको ट्रक

१ असार, चितवन । पृथ्वी राजमार्गअन्र्तगत चितवनको चुम्लिङटारमा शुक्रबार बिहान भएकाे सवारी दुर्घटना परी मृत्यु हुनेकाे संख्या ४ पुगेकाे छ ।

काठमाडौंबाट मुग्लिनतर्फ आउँदै गरेको ना ६ ख ४०६४ नम्बरको ट्रकले पोखराबाट काठमाडौंतर्फ जाँदै गरेको ग १ ख ७६९२ नम्बरको माइक्रोबसलाई पानीधारा भन्ने स्थानमा बिहान ०७ः२५ बजे ठक्कर दिँदा दुर्घटना भएको हो ।

दुर्घटनामा परी माइक्रोबसका चाल कास्की रुपाकोटका ३२ वर्षीय चन्द्रबहादुर केसीको मृत्यु भएको छ । उनको उपचारका लागि अस्पताल लैजाँदै गर्दा बाटैमा मृत्यु भएको हो ।

दुर्घटनामा थप १ महिला र २ पुरुषले ज्यान गुमाएका भए पनि उनीहरुको पहिचान खुल्न नसकेको चितवन प्रहरीले जनाएको छ ।

दुर्घटनामा ६ जना घाइते भएका छन् । प्रहरीका अनुसार उनीहरुको अहिले भरतपुर अस्पतालमा उपचार भइरहेको छ ।