काठमाडौं । इडिनसन काभानीको दुई गोलको मदतमा पोर्चुगललाई हराउँदै उरुग्वे विश्वकप फुटबलको क्वार्टरफाइनलमा पुगेको छ ।
शनिबार राति भएको खेलमा उरुग्वेले पोर्चुगललाई २–१ गोल अन्तरले हराएको हो । यससँगै लिओनल मेस्सीले विश्वकप गुमाएको केही घन्टापछि अर्का स्टार क्रिष्टियानो रोनाल्डो पनि बाहिरिएका छन् ।
नकआउट चरणको पहिलो खेलमा अर्जेन्टिना फ्रान्ससँग ४–३ गोल अन्तरले पराजित भएको थियो ।
काभानी चम्किए
खेलमा उरुग्वेले सातौं मिनेटमा नै काभानीको गोलबाट अग्रता लिएको थियो । पहिलो हाफमा दुबै टोलीबाट थप गोल हुन सकेन ।
दोस्रो हाफमा पोर्चुगलले गोल फर्कायो । उसका लागि पेपेले गोल गरे । तर, त्यसको ७ मिनेटपछि अर्थात ६२ औं मिनेटमा काभानीले दोस्रो गोल गरे ।
विश्वकपमा उरुग्वेको सुरुवात केही सुस्त देखिएको थियो । यद्यपि उसले इजिप्टलाई १–० ले हरायो । एकपछि अर्को खेलमा सुधार गरेको
उरुग्वेको डिफेन्स लाइन मजबुत त छँदैछ, फवार्ड लाइनमा लुइस स्वरेज र काभानीको राम्रो तालमेल देखिन्छ ।
मेस्सी र रोनाल्डो एकै दिन आउट
संयोग नै मान्नुपर्छ, एक दशकदेखि विश्वको उत्कृष्ट फुटबलरको होडमा प्रतिस्पर्धी रहेका मेस्सी र रोनाल्डो दुबै एकैदिन विश्वकपबाट बाहिरिए । सुरुमा मेस्सीको टिम बाहिरियो ।
त्यसको केही घन्टा नवित्दै रोनाल्डो पनि विश्वकपबाट बाहिरिएका छन् । चार वर्षपछि सन् २०२२ मा विश्वकप हुँदै गर्दा मेस्स ३५ वर्षको हुनेछन् भने रोनाल्डो ३७ वर्षका भइसक्नेछन् ।
