८ साउन, जनकपुरधाम । प्रदेश २ मा मन्त्रिपरिषद विस्तार बुधबार हुने भएको छ । प्रदेश सरकारमा सहभागी हुने तीन राज्यमन्त्रीले बुधबार सपथ लिने कार्यक्रम तय भएको छ । राष्ट्रिय जनता पार्टी नेपालले राज्यमन्त्रीका लागि नाम पठाएको ३ जनालाई मुख्यमन्त्री लालबाबु राउतले सपथ गराउने मुख्यमन्त्री तथा मन्त्रिपरिषदको कार्यालयले जनाएको छ ।
प्रदेश सरकार बनेको भएको ५ महिनापछि मन्त्रिपरिषद विस्तार हुन लागेको हो । राज्यमन्त्री सिफारिस हुनेमा सहमहामन्त्री सुरेश मण्डल, डिम्पलकुमारी झा र अभिराम शर्मा छन् । तिनै जनाको नाम हिजै टुंगो लागेको हो ।
मण्डललाई उद्योग तथा पर्यटन, झालाई भौतिक पूर्वाधार र शर्मालाई सामाजिक विकास राज्यमन्त्री सिफारिस गरिएको राजपाले जनाएको छ । राजपामा विवादको कारण सरकारमा सहभागी हुने राज्यमन्त्रीहरुको नाम ढिलो गरि टुंगो लागेको हो ।
राज्यमन्त्रीमा सहभागी हुने डिम्पल झा राजपा अध्यक्ष मण्डलका सदस्य अनिल झाकी पत्नी हुन् भने शर्मा असई थमन विकको हत्या प्रकरणका फरार अभियुक्त हुन् । शर्मा राजपा नेपालका अध्यक्ष महन्थ ठाकुरका विश्वास पात्र हुन् ।
२०७२ भदौ २५ गते बिहान महोत्तरी सदरमुकाम जलेश्वरमा आन्दोलनकारीको कुटपिटबाट घाइते भएका विकलाई दिउँसो उपचारको क्रममा जनकपुर ल्याउने क्रममा बाटोमा एम्बुलेन्सबाट थुतेर धान खेतमा कुटपिट गर्दा मृत्यु भएको थियो ।
विक हत्याको मुद्दामा सांसद शर्मालाई मुख्य अभियुक्त बनाइएको छ भने प्रहरीले शर्मासहित घटना संलग्न अन्य फरार रहेको बताउदै आएको छ । घटनामा जलेश्वरका मेयर रामशंकर मिश्र पनि अभियुक्त छन् ।
यता राजपा अध्यक्ष मण्डलका सदस्य राजकिशोर यादवले राज्यमन्त्रीमा पार्टीबाट सिफारिस भएको शर्मालाई आन्दोलनको क्रममा राज्यले फसाउने गरि मुद्दा लगाएको र पार्टीको लागि योगदान दिएको योग्य रहेको शर्मालाई राज्यमन्त्रीमा सिफारिस गरिएको बताए ।